Drim òr (10/11), tàm gơlang Củ tịc, Củ tịc lơgar ồng Nguyễn Xuân Phúc neh wă mò Sisay Leudetmounsone, Kwang atbồ mpồl rơndăp broă Đảng Làng bol Kăc màng lơgar Lào mờ Mpồl kwang bàng ala măt dờng màng Mpồl Rơndăp broă dà lơgar Lào gam geh dơ̆ tus còp lơh broă tàm lơgar Việt Nam.

Tàm dơ̆ wă, Củ tịc lơgar ồng Nguyễn Xuân Phúc đơs, lơgar Việt Nam sùm lơh ngan, pơn jăt tai dong kờl lơgar Lào sơrlèt mờ ală kal ke, rơhời kơl jăp, brồ guh wơl mờ tơnguh bơtàu lơh sa mpồl bơtiàn. Đơs tờm, nam 2022 geh kwơ màng mờ uă bơta tơngŏ niam tàm tơngai lơh git gơ̆p đah bàr lơgar dê, mò Sisay Leudetmounsone pà git, bàr gah neh pơgồp bal lơh uă broă lơh mùl màl, geh kwơ màng ngan, pơgồp bal bơnah tàm broă lơh niam mờ tơnguh broă lơh git gơ̆p bal đềt mềr, niam bơnĕ, tam klăc bal đah bàr Đảng, bàr dà lơgar mờ làng bol bàr lơgar dê. Mò Sisay Leudetmounsone đơs tờm, geh bal mờ ală rơnàng kwang đơng lam kung bè rơnàng kơnòm să lơgar Lào pơn jăt tai prăp gàr mờ bơ̆t bơtàu broă lơh git gơ̆p kwơ màng ờs mờng niam bơnĕ đah bàr Đảng, bàr dà lơgar dê.