Mho ngai 19/7, tàm Ủy ƀan Ñân zân kơnhoàl Côn Đảo, Củ tịc lơgar ồng Võ Văn Thưởng tìp mat Kwang ala mat Lơh broă sùm Mpồl tàm yal jơnau cau ling kac màng Việt Nam gơtìp bol sò tơm kup, pù pờng mờ 76 nă cau jàm cíñ trị lài do Côn Đảo, ala mat ai rlau 5 rbô nă kwang bàng, cau ling kac màng gơtìp bol sò tơm kup, pù pờng nàng lùp còp, pơn jờng mờ cih dờp dà kơl hề, bơta phi să dờng màng bơh git nđờ rài cau ling kac màng, ală cau khin cha jak chài chơt màng mờ làng bol kờñ gơboh dà lơgar dê, tài broă lơh tơngklàs jơi bơtiàn. Tàm dơ̆ tìp mat, ală kwang bàng neh kah wơl dùl tŭ tơngai bòl glar, kal ke mơya khin cha jak chài bơh ală cau khin cha jak chài kơ̆ dơn dê, bulah gơtìp pù pờng jàñ bơsak ngan, pal tàm pơ gơl mờ mhàm, ntìng, màng kis, mơya kung sùm gàr kơ̆ nùs nhơm kac màng.

Tơnơ̆ uă nam rê wơl Côn Đảo, uă cau jàm cíñ trị lài do ai lơh chờ hờp ngan tŭ sền gŏ bơta tam gơl bơh tiah neh geh tŭ geh sền là “brah tìng dunia”, tiah mờ tàm tơl pơnai lŭ, ntê chi, tờm nhơt lài do neh geh tŭ gơ trum mhàm, ntìng bơh ală cau ling kac màng kơ̆ dơn dê. Đơs tàm dơ̆ tìp mat, Củ tịc lơgar ồng Võ Văn Thưởng pơyua jơnau lùp còp đềt mềr, ală nùs nhơm ki ngàm, kah ưn ngài uă ngan rlau jơh tus ală cau jàm cíñ trị lài do Côn Đảo; pà git, ală nam do, Đảng, Dà lơgar sùm sền gròi gơ wèt mờ rlau 9 tơlak nă cau geh màng mờ dà lơgar; pơn jat tai sơlơ tơnguh rlau tai broă lơh kis git jơnau git adat, kuơmàng là broă tờ tơrgùm ƀồc ntìng cau ling chơt màng, lơh niam wơl ală ƀlàng tơp ƀồc, lơh niam wơl tai ală bơtô ƀồc, ai tơnggŏ bơhiàn hùc dà kah tô dà.

Mho dùl ngai bal, Củ tịc lơgar neh lòt còp sền Ƀảo tàng Côn Đào mờ Tiah tềl kah yau Hìu jàm Phú Hải.