Rơndăp broă lơh bơnah broă gùng rơndeh lòt mhar Hoài Nhơn – Quy Nhơn gơwèt gơl gùng rơndeh lòt mhar Đah tô – Đah jum tàm tiah đah măt tơngai Lik tŭ do neh lơh gơs broă lơh. Mpồl Atbồ rơndăp broă lơh sồ 85 pà git gam lơh gơs ală sră nggal dŭt ndơl nàng ai gơl gùng do mŭt tàm broă ai ngui lơh broă di tàm Satềp tus. Bi Nguyễn Trọng Quân, cau lơh gùng gơwèt Kông ty tă priă bal 479 Hoà Bình chờ hờp tŭ bal mờ ală cau kỹ sư-cau lơh gùng tàm kông ty neh lơh gơs kơnòl broă, pơgồp bal tàm broă ai rơndăp broă lơh do lơh gơs gờñ. “Đơs bal broă lơh bơh bol añ dê kung glar bòl ngan, geh broă sền gròi bơh kwang bàng den tàng đơs ngan là bol añ kung lơh ngan lơh broă sùm, tơnguh sùm cau lơh broă bal mờ lơh tàm tŭ trồ mang tai nàng lơh gơs di mờ tơngai neh geh ai, broă lơh gam geh lơh den tàng oh mi ơm lơh broă mờ lơh ngan nàng lơh gơs kơnòl broă geh gơnoar atbồ jào”.

Tus tàm broă lơh gùng rơndeh lòt mhar Chợ Mới – Bắc Kạn, Đại tá Võ Khắc Hùng, Phó Đơng lam Ling mpồl 12, Tổng Kông ty Bơ̆t bơtàu Trường Sơn pà git: Rơndăp broă lơh lòt gan ù tiah kơh bơnơm, koèl kơh, kal ke, jòng 28,8 kơi sồ, kờp jơh priă tă lơh rơlao 5 rơbô 750 tơmàn đong. Ală cau ling Wa Hồ gam lơh ngan lơh mhar nàng gơs broă lơh gùng do. “Cau ling Trường Sơn bol añ pơnyờ să ngan, geh Đảng Dà lơgar jào uă ngan rơndăp broă lơh kwơ màng, bè ală rơndăp broă lơh gùng rơndeh lòt mhar. Bol añ ai do là rơndăp broă lơh kwơ màng ngan den tàng lơh ngan lơh “ngai kung bè mang, di jăt mờ nùs nhơm cau ling dê nàng lơh gơs”.

Tàm ală mpồl lơh sa kă bro lơgar Việt Nam pơgồp bal tàm jơnau kờñ lơh gơs rơlao 3 rơbô kơi sồ gùng rơndeh lòt mhar tàm tơngai do geh Ƀộ Trưởng Ƀộ Bơ̆t bơtàu ồng Trần Hồng Minh neh uă dơ̆ lam sồr, mờ nùs nhơm pin dờn mờ pơnyờ să, bè: Phương Thành, Đèo Cả, Sơn Hải, Lizen, Vinaconex, Trường Sơn… Ală mpồl lơh sa kă bro neh lơh di mờ jơnau hơ, ngui bơta chài măi mok, tơnguh tơngai lơh, cau lơh broă, geh tŭ pal “dờp mờ broă tơrmù priă cồng, dờp ờ geh uă priă” tài tơngai lơh ală rơndăp broă lơh. Đơs pơniơu bè ồng Phạm Văn Khôi, Củ tịc Mpồl duh broă Atbồ broă Kông ty Phương Thành yal, mpồl lơh sa kă bro ồng dê tus bal lơh 4 rơndăp broă lơh gùng rơndeh lòt mhar. Tàm hơ̆, geh 2 rơndăp broă lơh tơngai 2 geh Vũng Áng – Bùng mờ Vân Phong – Nha Trang.

Tus wơl tàm tiah đah Jum, tus mờ tiah rign dà dờng Cửu Long, ồng Trần Văn Thi, Kwang lam bồ Mpồl Atbồ rơndăp broă lơh Mỹ Thuận-do là cau neh lơh broă tàm Gah gùng lòt mờr 30 nam do-kơno ồng yal bè ală ngai nhai git nđờ rơbô nă cau lơh broă, kỹ sư gah lơh rơbàng gùng lòt lơh ngan lơh gơs ală broă lơh tờm dà lơgar dê, mờ bơta pràn, bơta ngăc ngar bơh ală cau cèng geh jơnau sồr “lòt lài pờ gùng” tàm ală gơl gùng rơndeh lòt mhar jăt gùng pơrgan, bơh Cần Thơ tus Cà Mau: “Mờ mpồl kỹ sư, cau lơh gùng lơgar Việt Nam dê, bol añ lơh ngan tàm pơrlòng nàng lơh gơs ală broă lơh gờñ ai ngui nàng drơng làng bol in, drơng dà lơgar in mờ kung là nàng lơh pràn gơguh lơh sa. Bal mờ broă bơ̆t bơtàu phan bơna ai dà lơgar in, den broă lơh tờm bal mờ bơta pràn măi mok bơh mpồl lơh broă dê, bơh broă atbồ tus mờ broă pơlam lơh, tus mờ broă lơh kung bơtàu tơnguh jơh. Bol añ pơnyờ să ngan sền gŏ tơngai bơtàu tơnguh bơh gah do dê bal mờ broă bơtàu tơnguh dà lơgar dê, bol añ gŏ gơlơh pơnyờ să ngan”.

Git nđờ rơhiang rơbô nă kòn bơnus, mờ nùs nhơm tàm pơrlòng “ờ ngòt trồ tơngai trồ mìu, lơh broă sùm ờ geh ngai ơm, ngai satềp, lơh ngan lơh mang” nàng ai ală rơndăp broă lơh gùng rơndeh lòt mhar lơh gơs di mờ tơngai geh ai ha là sơrlèt mờ tơngai geh ai. Dan tơlik jơnau đơs bơh Phó Giáo sư, Tiến sìh ồng Trần Chủng, Củ tịc Mpồl ală Cau bơcri priă lơh gùng lòt ù gờl Việt Nam tŭ đơs bè bơta pràn, lơh broă bơh ală cau lơh gơs ală broă lơh rài kwơ màng dê bè do: “He pal tơlik nùs nhơm ưn ngài gơwèt mờ ală cau lơh broă gah gùng lòt mờ Wa Hồ lài do đơs là “cau lơh gùng”. “Cau lơh gùng glar ngan ơ ală cau”. Glar bòl ngan. Den tàng he ưn ngài ală cau do. Ưn ngài ală cau “cau lơh gùng pa” tŭ do neh lơh he in ală broă lơh gùng rơndeh lòt mhar sùm lơngăp lơngai, lơh pràn broă bơtàu tơnguh lơh sa, gàr niam ai làng bol bal mờ đềt mềr mờ tiah kis in”.

Rơlao 3 rơbô 500 kơi sồ gùng lòt ù gờl neh lơh gơs, pờ geh bơta tờm pràn pa ai broă bơtàu tơnguh dà lơgar in mờ pơn jăt tai lơh geh nùs nhơm pin dờn tàm jơnau kờñ lơh geh 5 rơbô kơi sồ gùng rơndeh lòt mhar tàm nam 2030. Đah ngkời ală gùng dờng ơnàng do là dà kơlhề, bồ tơngoh ngăc ngar bal mờ nùs nhơm lơh broă sùm ờ ngòt dil bơh git nđờ rơhiang rơbô nă kỹ sư, cau lơh gùng, cau ling Trường Sơn mờ ală mpồl lơh sa kă bro lơgar Việt Nam gam lơh broă sùm ờ geh ngai ơm, ờ geh ngai satềp, ngai kung bè mang ơm sùm tàm tiah lơh gùng lòt. Ală gơl gùng tŭ do là bơnàng jă ai rơnàng tơnơ̆ do in-nàng lơgar Việt Nam mhar gơguh lơh sa kơl jăp, lòt mhar rơlao, lòt ngài rơlao tàm tơngai mŭt tàm rài pa, rài brồ să bơh jơi bơtiàn dê.