Lòt bal mờ Tổng Ƀí thư ồng Tô Lâm geh Thủ tướng Cíñ phủ ồng Phạm Minh Chính, Củ tịc Quôk hội ồng Trần Thanh Mẫn bal mờ uă oh mi đơng lam kâp dờng Đảng, Dà lơgar he dê. Việt Nam mờ Campuchia lơh gĭt gơ̆p cribơyai broă mờ lơgar ndai ngai 24/06/1967, tŭ do Việt Nam là cau tam klăc lơh broă bal kă bro phan dờng dơ̆ 3 bơh Campuchia dê, tơnơ̆ Lo mờ Mỹ. Dơ̆ lòt lơh broă bơh Tổng Ƀí thư ồng Tô Lâm dê là tŭ nàng ală kwang đơng lam dờng ngan rlau jơh bơh bàr lơgar dê sơlơ cribơyai tơm bơh bơr, lơh kơ̆ kơl jăp bơnàng jă pin dờn cíñ trị, ai tơl bơta lam lơh geh cồng nha ală jơnau ring bal neh lơh geh; bơh hơ̆ lơh jrô ơnàng rlau tai bơta gĭt gơ̆p lơh bơyô ờs mờng bơh yau đah bàr Đảng, bàr lơgar, lơh gơlik gơn kơnờm ai gĭt gơ̆p Việt Nam mờ Campuchia bơtàu tơngguh tus gĭt gơ̆p tơl làm pa.

 Lài hơ̆, tàm tơngume dơ̆ lòt còp lơgar Lào, Tổng Ƀí thư ồng Tô Lâm neh geh dơ̆ pơrjum bơyai mờ Tổng Ƀí thư, Củ tịc lơgar Lào ồng Thongloun Sisoulith; tìp mat kấp dờng Thủ tướng lơgar Lào ồng Sonexay Siphandone, Củ tịc Quôk hội lơgar Lào ồng Saysomphone Phomvihane; wă Củ tịc Mặt trận lơgar Lào bơt bơtàu Dà lơgar ồng Kikeo Khaykhamphithoune; còp Anih lơh broă ala mat lơgar ndai lơgar Việt Nam tàm lơgar Lào mờ tìp mat mpồl bơtiàn cau Việt Nam kis tàm lơgar Lào... Di dơ̆ do, Thủ tướng Cíñ phủ ồng Phạm Minh Chính tìp mat Thủ tướng lơgar Lào ồng Sonexay Siphandone; Củ tịc Quôk hội ồng Trần Thanh Mẫn tìp mat Củ tịc Quôk hội lơgar Lào ồng Saysomphone Phomvihane; đơng lam bồ bàr pe ƀộ, gah broă 2 lơgar dê kung neh tìp mat cribơyai yal tơngĭt jơnau, sơlơ tơnguh tai lơh broă bal đah 2 gah. Tàm tơngume dơ̆ lòt còp, neh geh bơyai lơh dơ̆ jàu ală sră nggal lơh broă bal kwơ màng đah ală Ƀộ, gah broă, ală tiah bơh lơgar Lào mờ Việt Nam dê tàm ală gah bơto bơtê, sền gàr adat boh lam mờ lơh broă bal đah ală tiah; pơn jat tai lơh geh tơngume adat boh lam mờ bơta gơn kơnờm pa, lơh loh làng broă lơh tam klăc bal kwơ màng tàm bơta gĭt gơ̆p đah 2 lơgar dê.