Do là ală cau geh pơnrơ jăk tàm broă bơsram sră, lơh jăt ơnà jăk, nùs nhơm niam Hồ Chí Minh dê, geh pơgồp bal di pal tàm broă Đoàn mờ broă ơruh pơnu, kơnòm pa tào bal mờ kơnòm dềt, geh bơngă pin dờn mờ gơrềng bal niam tàm đoàn viên, ơruh pơnu Mpồl ală anih lơh broă gơwèt Dà lơgar.

Củ tịc lơgar ồng Võ Văn Thưởng chờ gờm, pơn jờng ală kwang bàng ala măt ơruh pơnu gơguh jăk Mpồl ală anih lơh broă gơwèt Dà lơgar bè ală cồng nha bal mờ broă neh geh lơh tàm tơngai do, mờ đơs tờm tus mờ bơta kwơ màng bơh ơruh pơnu Mpồl ală anih lơh broă gơwèt Dà lơgar đơs is, ơruh pơnu gùt lơgar đơs bal tàm broă bơ̆t bơtàu mờ sền gàr Dà lơgar. Củ tịc lơgar kơ̆p kờñ ală đoàn viên ơruh pơnu bŭ lah lơh broă tàm gah lơi kung pal lơh niam broă lơh bơh să tờm dê mờ kơnòl bal mờ bơta niam uă ngan nàng drơng Dà lơgar, drơng làng bol in, di pal là cau ơruh pơnu gơguh jăk dê.