Wă Đại sứ lơgar Qatar, ồng Khalid Ali Abdullah Abel, Củ tịc lơgar chờ hờp ngan bè bơta git gơp lơh bơyô, lơh broă bal đah 2 lơgar bơtàu tơnguh niam ngan, sùm tàm pơgơl, cribơyai broă mpồl kwang bàng ală kâp, rềp ndo là dơ̆ lòt còp ngan ngồn lơgar Qatar bơh Phó Củ tịc lơgar mò Võ Thị Ánh Xuân dê. Củ tịc lơgar sồr ồng Đại sứ tàm kơnòl broă he dê sơlơ tơnguh bơta git gơp đah 2 lơgar bè tơl gah mờ kơp kờñ gờñ wă rò bơtau lơgar Qatar ồng Sheikh Tamim bin Hamad Al-Thani còp lơgar Việt Nam tàm nam 2023.

Wă Đại sứ lơgar Brazil ồng Marco Farani, Củ tịc lơgar ồng Võ Văn Thưởng đơs nền, Việt Nam sùm sền dờng màng mờ kơp kờñ sơlơ tơnguh rlau tai bơta git gơp lơh bơyô mờ lơh broă bal tơl làm mờ Brazil. Tàm ală dơ̆ wă, Củ tịc lơgar ồng Võ Văn Thưởng ưn ngài mờ đơs niam ală lơgar kờñ gùng dà bơh ASEAN mờ Việt Nam dê bè bơta dà lềng đah mat tơngai lik, bơsong ală tam pìt tam phà mờ ală broă lơh ring lơngai jat bơnàng jă lài ngan ki ngàm adat boh lam, ngan là UNCLOS nam 1982, gàr niam lơngap lơngai, khat gơboh gùng dà lềng mờ gùng rơndeh par; gàr sùm ring lơngai, kơ̆ kơljap mờ bơtàu tơnguh tàm tiah do.