Mờ bơta “Khin kơlôi, khin lơh, tài bơta kwơ bal”, Ƀòn dờng Hồ Chí Minh ai jơnau kờñ, nùs nhơm bơ̆t bơtàu jơnau rơcang cih Nghị quyết ala Nghị quyết sồ 54 bè: tơrgùm bơsong ală bơta gơkòl, bơsong kal ke bè kơrnoăt pal jăt, broă dong kờl, ai geh bơta ƀuơn tàm broă hòi jà bơcri priă nàng dong kờl Ƀòn dờng gơtùi lơh gơs kơnòl “lam lài” lơh sa, tă pơgồp pràn kơl dang tàm broă tơnguh bơtàu bal bơh dà lơgar dê.

Đơs tàm dơ̆ lơh broă, Củ tịc Quốk hội ồng Vương Đình Huệ đơs là, Rơndăp broă do geh kwơ màng ngan tàm broă dong kờl Ƀòn dờng ngui niam ală bơta pràn gơguh lơh sa, tơnguh bơtàu mhar mờ kơl jăp rơlao tai, jăt bơta geh ai, Ƀòn dờng Hồ Chí Minh tài gùt lơgar, gùt lơgar tài Ƀòn dờng Hồ Chí Minh. Củ tịc Quốk hội ồng Vương Đình Huệ sồr, Ƀòn dờng pal tơrgùm ală mpồl broă lơh dờng, geh tơrgùm bal mờ mùl màl gam tìp ală bơta kal ke, tiah gơkòl.