Tơngkah kir sơnrai 30 nam ngai lơh Kes priă VIFOTEC mờ dờp Gai lòng Lơh broă khà dùl. Đơs tàm dơ̆ bơyai lơh, Củ tịc Quôk hội ồng Vương Đình Huệ pin dờn, đơs: Kes priă VIFOTEC geh pơn jăt tai lơh bơnàng jă ai ală bơta hàm kờñ kơlôi sơnơng jak chài măy mok tàm jơh ală rơnàng làng bol, lơh geh wơl bơta kờñ ngan bơceh lơh gơwèt mờ rơnàng kơnòm să tàm jơh gùt lơgar, dong ală oh gơ gơs là ală cau tờm, cau bơceh mòn tàm rài tơnơ̆ do, tă pơgồp kwơmàng nàng bơ̆t bơtàu dà lơgar pas sơm mờ bơtàu tơnguh.

Củ tịc Quôk hội ồng Vương Đình Huệ jàu khà jờng 4 khà dùl VIFOTEC

Nàng kờñ lơh geh wơl uă rlau tai bơta hàm kờñ kơlôi sơnơng, pràn bơceh lơh, lơh bơtàu tơnguh jak chài măy mok dà lơgar he dê, Củ tịc Quôk hội sồr, Kes priă pal tơrgùm tơnguh uă bơta niam mờ bơngă bơh ală Khà jờng, ală dơ̆ pơrlòng dê; Pơn jăt tai kơlôi tus broă tờm tàm ală broă bơ̆t bơtàu, broă lơh gơwèt ală gah broă lơh jak chài măy mok geh bơta gơtùi ngui uă tàm rài kis ngan ngồn; bàr pe gah broă lơh ală gah đah jak chài geh is mờ jak chài măy mok mờ măy mok; ală gah broă lơh. Geh 45 broă bơ̆t bơtàu jak ngan rlau jơh neh geh dờp Khà jờng Bơceh lơh jak chài măy mok Việt Nam nam 2021.