Ñă sền hiòng dà ñhăng ngan, ồng Rơ Lah Kem ơm tàm xã Chư Rcăm, kơnhoàl Krông Pa, tă nhơm jòng muăt jrùm đơs: 1 lồ ù bơh hìu bơnhă ồng dê bal mờ pơgap 100 lồ ù bơh làng bol ƀòn H’Lang dê neh gơtìp dà dờng Ba “cò pơrdô jơh”. Ồng Rơ Lah Kem, đơs: Lài do, 1 lồ añ lơh geh bơh 5 tus 6 tấn. Ù tŭ do tơrlah jơh rao, dà cò pơrdô jơh. Bàr pe hìu bơnhă tàm do ntrờn jơh rao, ờ ntrờn ờ gơ tùi, tiah do mờr tơrlah tus rao. Bàr pe nă cau tàm do neh lòt jơh.

 Làng bol ƀòn H’Lang rcang ntrờn tus tiah ơm kis pa nàng rcang sơndră tơrlah ù (rùp: Nguyễn Thảo)

Ồng Hà Văn Đường, Củ tịc Ủy ƀan Ñân zân xã Chư Rcăm pà gĭt, bơdìh mờ 100 lồ ù tam phan bơh làng bol ƀòn H’Lang dê gơtìp dà cò pơrdô jơh, bơta tơrlah ù tàm dà dờng Ba kung gam pơhìn rài kis bơh rlau 100 hìu bơnhă làng bol tàm tiah do dê. Rbàng Lệ Bắc, tàm tơrbŏ 2 xã Chư Rcăm mờ Ia Rsươm neh gơtìp tơrlah mờr tus jrong rbàng 2 gah dê.

Nàng gàr niam bơta lơngap lơngai ai làng bol in, lồi nam 2020, Ủy  ƀan Ñân zân kơnhoàl Krông Pa neh kĭ rơndap broă lơh bơcri lơh broă lơh rơndap tap sèng, bè ờs wơl tài kis làng bol ơm kis tàm ƀòn H’Lang in, bă ù mờr 7 lồ nàng ntrờn rlau 102 hìu bơnhă làng bol kòn cau Jrai tàm tiah geh bơta pơhìn tơrlah ù. Ủy ƀan Ñân zân xã Chư Rcăm kung neh geh yal mờ kơnhoàl nàng jòi gùng dà broă lơh pà ù lơh sa ai làng bol kòn cau dùl ết nă cau gơtìp tơrlah ù jơh tơn.  Ồng Hà Văn Đường, đơs: Tŭ do, hơ̆ là hiòng hòr tờm bơh dà dờng Ba dê den dà dờng cò pơr dô jơh ù tiah  hơ̆. Đah do, gơ tơrlah tàm ƀlàng tơ̆p ƀồc mờ tiah làng bol ơm kis den pal lơh rơndap broă lơh ntrờn làng bol. Gơrềng uă ngan, hơ̆ là roh jơh tơn bă ù hơ̆ mờ ală hìu bơnhă kis kềng gah dà dờng. Bơta kal ke là ù lơh sa bơh xã Chư Rcăm dê ờ uă, tŭ do pal tam gơl ù tơrmù ù lơh sa ai làng bol in.

Rlau 100 lồ ù lơh sa suơn sre bơh làng bol ƀòn H’Lang neh gơ gơs tàm dơlam dà dờng Ba (rùp: Nguyễn Thảo)

Ồng Hồ Văn Thảo, Củ tịc Ủy ƀan Ñân zân kơnhoàl Krông Pa pà gĭt, kơnhoàl geh 13 tiah tơrlah jat kềng gah dà dờng jòng pơgap 45 kơi sồ tiah dà dờng Ba hòr gan 8 xã, thị trấn. Gơl tơrlah kơn jơ̆ ngan rlau jơh gơlik geh tàm 2 xã Ia Rsai mờ Chư Rcăm. Tơngai pa do, tàm ală bơta khà priă ờ hoan geh bơh kơnhoàl rƀah dê, kơnhoàl pa tơrgùm gàr niam bơta lơngap lơngai ai làng bol in mờ broă lam lơh ală rơndap broă lơh ntrờn làng bol lik bơh tiah tơrlah ù. Jat hơ̆, tơngai bơh nam 2012-2014, kơnhoàl gam lam lơh rơndap broă lơh ai rlau 870 nă cau tàm 4 ƀòn bơh xã Ia Rsai in. Nam 2019, kơnhoàl pơn jat tai lơh rơndap broă lơh làng bol ơm kis jal mhar ai 31 hìu bơnhă mờ 166 nă cau ơm tàm 2 xã Ia Rsươm mờ xã Ia Rsai. Nam 2020 tus tŭ do, pơn jat tai lơh jat rơndap broă lơh ntrờn rlau 102 hìu bơnhă làng bol ƀòn H’Lang. Tus tŭ do, bơta tơrlah ù jat kềng gah dà dờng Ba kung gam gơlik geh pah ngai mờ ờ hềt geh broă lơh lơi nàng kơryan.

Rài kis bơh làng bol dê gơtìp pơhìn, ù lơh sa roh jơh, mơya ờ hềt geh broă lơh nàng kơryan jơh (rùp: Nguyễn Thảo)

Ồng Hồ Văn Thảo, pà gĭt: Lài ngan den gàr niam màng kis, phan bơna ai làng bol in, phan bơna dà lơgar dê là lơh lài ngan khà 1. Priă nàng lơh ƀơtơ̆t kơryan tàm ƀòn H’Lang in den lời wơl nàng ntrờn làng bol ai gơ in mhar, lơh bơtơ̆t kơryan gĭt nđờ rơhiang thơk là jơh gĭt nđờ rơhiang tơmàn đong. Ủy ƀan Ñân zân xã neh tơrgùm jơh nàng yal mờ Ủy ƀan Ñân zân càr, den càr yal wơl mờ Ƀộ Nông nghiệp mờ phát triển Nông thôn.

Gơnoar atbồ kung bè làng bol kơnhoàl Krông Pa, càr Gia Lai, kơ̆p kờñ ală kấp ală ngàñ bơh dà lơgar tus càr gờñ geh ală broă lơh kwơ màng nàng bơsong jơh bơta tơrlah ù jat kềng gah dà dờng Ba, gàr niam rài kis ai làng bol in.