Nam do, tơngai ơm rlô sa tềp dà lơgar jŏ jòng, bal mờ trồ tiah lơngơm, niam den tàng ƀòn dờng Dà Làc, càr Lâm Đồng gơ hòi gơ jà uă ngan năc lòt nhơl tus sền, ơm rlô. Năc gal ngan, bàr pe anih drơng broă ñô sa tàm tiah tờm geh tŭ gơ ơm tàm bơta gal ir mơya tơl broă lơh ndrờm bơyai lơh niam mờ gàr niam. Pal sền gròi là, tài bơh khà năc lòt nhơl rah rài, ờ gơguh nisơna dùl tŭ bal den tàng ală hìu năc, hìu ơm rlô lơh di jơnau kờñ ơm ing jơh mang bơh năc dê.

Jat gah nhơl chờ càr Lâm Đồng yal, kờp jơh năc lòt nhơl tus sền, ơm rlô tàm Dà Làc tàm tơngai sa tềp do kờp dŭ 250 rơbô nă, gơguh 2,5 dơ̆ pơndrờm mờ dơ̆ sa tềp dà lơgar nam lài; tàm hơ̆ geh 12 rơbô 500 nă năc dunia. Tŭ do bulah neh jơh tơngai ơm rlô sa tềp Dà lơgar mơya Dà Làc kung gam pơn jat tai gơ hòi gơ jà năc lòt nhơl chờ nam pa.