Lòt dùl dar sền ală tờm chi pa tam tàm tiah brê bồ tô xã Ia Lốp, kơnhoàl Ea Súp, càr Dăk Lăk, ồng Nguyễn Văn Diện, atbồ mpồl atbồ, sền gàr, rơcang sơndră ồs sa brê thôn Ƀòn ơruh pơnu sơn đờm mut lơh broă pà git, tiah do pa geh tam git nđờ jơt rbô tờm sao jù mờ xà kừ: “Lam lơh broă lơh tam tờm chi lơh gơlik brê den să tờm bol hi là ală cau sền gàr mờ là ală cau geh lơh jat, tus bal mờ mpồl atbồ mờ ală mpồl, gah broă lơh nàng lơh ngan pah nam geh rơcang sơndră ồs sa mờ sơngka sền gàr, nàng tờm chi in hòn gơs niam ngan rlau jơh”.

Lam lơh broă lơh Tơlak tờm chi tơlir- Tài dùl Việt Nam tơlir, tàm nam do, neh geh 76 rbô tờm chi geh tam tàm bă ù rlau 63 lồ tàm tiah brê bồ tô kơnhoàl tiah nhàr dà lơgar Ea Súp, càr Dăk Lăk. Sao jù mờ xà kừ là ală sơntìl chi geh tam tài gơ dờp mờ bơta trồ tiah tàm ƀòn lơgar, geh bơta pràn hòn dờng niam. Bi Trần Thị Thúy, Phó Ƀí thư Huyện đoàn Ea Súp yal, broă lơh tam chi neh dờp geh bơta sền gròi bơh ală mpồl, gah broă lơh, mpồl cau, dờp geh bơta lơh jat mờ bơta tus bal bơh làng bol dê, ngan là mpồl đoàn viên ơruh pơnu: “Bol hi geh pơn jat tai mblàng yal tus đoàn viên, ơruh pơnu mờ làng bol lơh jat broă lơh do. Tơl nă cau pah nam geh tam dùl tờm chi, tơnguh khà jơm glòm brê tàm ƀòn lơgar. Tơnơ̆ tŭ tam den bol hi geh pơn jat tai sơngka sền gàr nàng tờm chi in hòn gơs niam, cèng wơl dà tơlir ai kơnhoàl tiah nhàr dà lơgar Ea Súp bol hi in”.

Broă lơh Tơlak tờm chi tơlir- Tài dùl Việt Nam tơlir

Bal mờ Dăk Lăk, tàm nam 2022, Đoàn dà lơgar kung lam lơh tam pa 25 rbô tờm chi tàm bă ù rlau 14 lồ tàm xã Quảng Sơn, kơnhoàl Dăk Glong, càr Dăk Nông. Ồng Vũ Đức Hưng, kwang atbồ cơldŭ Kỹ thuật atbồ, sền gàr brê- Kông ty TNHH MTV Tam sền gàr brê Quảng Sơn pà git: “Tiah brê mờ broă lơh Tơlak tờm chi tơlir- Tài dùl Việt Nam tơlir tam nam do geh kuơ dờng màng ngan tàm broă lơh rơcang sơndră dà kŏ dà cò mờ brê bồ tô tàm Dăk Nông. Kông ty tam sền gàr brê Quảng Sơn pơgồp bal mờ làng bol tàm tiah do sơngka sền gàr mờ sền gàr bă brê tàm tơngai tus nàng lơh gơlik dùl pơngàr tơlir, sền gàr rài kis làng bol gùt dar tiah do dê”.

Bơh nam 2021 tus tŭ do, broă lơh Tơlak tờm chi tơlir- Tài dùl Việt Nam tơlir neh lam lơh tam chi brê bồ tô tàm 4 càr Quảng Nam, Quảng Ngãi, Dăk Lăk mờ Dăk Nông. Jơnau kờñ là tus nam 2025 geh tam pa 100 tơlak tờm chi tàm làm gùt lơgar, nàng kờñ pơgồp bơnah lam lơh rơndap broă tam 1 tơmàn tờm chi tơlir bơh Cíñ phủ dê.

Uă mpồl tus bal tam chi

Jat bi Ngô Văn Cương, Ƀí thư Ƀan Cấp hàñ Đoàn dà lơgar đơs, mờ broă lam lơh li la, di mờ tơl tiah, broă lơh pơgồp bơnah tơnguh jơnau git wă bơh đoàn viên, ơruh pơnu, kơnòm pa tàu mờ làng bol dê bè bơta kuơ bơh brê dê, broă sền gàr brê, sền gàr dà, wèt tus bơta bơtàu tơnguh kơ̆ kơljap: “Tàm tơngai pa do den Đoàn dà lơgar kung neh pơgồp bal mờ uă mpồl lơh broă nàng lam lơh gơtùi ală broă geh jàu do. Broă lơh kung gơ hòi gơ jà đoàn viên, ơruh pơnu kung bè làng bol tus bal jơh nùs ngan mờ git nđờ tơlak nă đoàn viên ơruh pơnu tus bal tàm gùt lơgar. Tơl nă đoàn viên ơruh pơnu geh tam pa mờ sơngka sền gàr êt ngan rlau jơh 1 tờm chi tàm dùl nam. Bơh broă lơh do den bol hi kơp kờñ Việt Nam bơh bol he dê tàm tơngai tus kung tơlir rlau, niam rlau mờ kơ̆ kơljap rlau”.

Bal mờ broă lơh Tơlak tờm chi tơlir- Tài dùl Việt Nam tơlir”, nam do, Ủy ƀan Ñân zân càr Dăk Nông kung neh lam lơh Sa tềp tam chi sùm sùm kah ưn ngài Bác Hồ. Tàm 3 tơlak tờm chi geh tam tàm dơ̆ do, geh mờr 1 tơlak tờm nho 3 nha geh tam jat kềng ală gùng dờng 14 mờ 28, tàm ală tiah mờ brê gam gơtìp mus kơl, sơ gràm tìs mờ adat boh lam. Ồng Lê Quang Dần, Phó Kwang atbồ Sở Nông nghiệp mờ Phát triển Nông thôn càr Dăk Nông pà git, brê tàm tiah kis, brê rơcang gàr bồ tô jat kềng ală gùng dờng tàm tơngai lài gơtìp mus kơl, gơtìp sơ gràm uă ngan.

Nam 2022 neh tam mờr 80 lồ brê bồ tô

Tềng đap jơnau pơhìn brê tàm tiah ơm kis gơtìp aniai, càr lơh ngan tam wơl brê tàm ală tiah do. Mìng is tàm dơ̆ lam lơh Sa tềp tam chi sùm sùm kah ưn ngài Bác Hồ, bal mờ đoàn viên, ơruh pơnu, kwang bàng, kông ñân viên ală anih lơh broă dà lơgar, càr Dăk Nông neh hòi jà rlau 3 rbô 250 nă kwang bàng, cau ling ală mpồl ling, kwang àng tus bal tam chi tàm ală tiah gơlik geh mus kơl brê uă tàm gùng dờng 14 mờ 28, mờ jơnau đơs “ai bơt bơtài nàng dră wơl bơta mus aniai”: “Pal geh nùs nhơm niam, hơ̆ là ai bơt bơtàu nàng dră wơl. Bol hi lơh ngan kờñ lam lơh. Dơ̆ do, Ủy ƀan Ñân zân càr neh hòi jà uă ngan mpồl ling, kwang àng tam tàm ală tiah do nàng ai tơnggŏ nùs nhơm lơh ngan tàm broă atbồ, sền gàr, lơh gơlik wơl brê tàm 2 gùng dờng do”.

Càr Dăk Nông tŭ do gam mờr 260 rbô lồ brê, khà jơm glòm mờr 38%, lơyah rlau 4% pơndrờm mờ khà kờp bal gùt lơgar. Càr gam lơh ngan tơnguh khà jơm glòm brê gơguh tus 40% tàm nam 2025 mờ 42% tàm nam 2030.