Do là bơta pơnrơ ngan tàm broă lơh bơto pơlam, yal tơngĭt broă lơh, geh yal tàm Pơrjum tơn jơh broă lơh do, bơh Sở Lao động, Thương ƀiñ mờ Xã hội càr Dăk Lăk dê bơyai lơh tàm mho ngai 16/12. Jăt jơnau yal tàm Pơrjum, nam 2022, jơh gùt càr neh ai geh broă lơh ai pơgăp 41 rbô 250 nă cau in, ndrờm mờ 103,12% pơndrờm mờ broă rơndăp lơh mờ 1 rbô 472 nă cau neh lòt lơh broă tàm lơgar ndai, ndrờm mờ 106% broă rơndăp lơh nam. Kờp tus tŭ do, khà cau geh lòt lơh broă tàm lơgar ndai jăt sră pơrgon tơngai bơh nam 2018- 2022 là 5 rbô 372 nă. Ồng Nguyễn Văn Cường, Phó Kwang ătbồ Anih tờm Drơng broă lơh càr Dăk Lăk pà gĭt, bulah kung gam gơtìp gơrềng tài bơh kòp Kovid-19 mơya càr neh pờ geh rlau 80 dơ̆ drà broă lơh; bơto pơlam, yal tơngĭt broă lơh, là nam geh khà dơ̆ bơyai lơh Dơ̆ drà broă lơh uă ngan rlau jơh bơh lài tus tŭ do.