Nam do, càr Dăk Lăk geh rơlao 21 rơbô 100 nă cau pơrlòng dan cih măt tus bal pơrlòng, tàm hơ̆ geh rơlao 610 nă cau pơrlòng khăt gơboh. Càr Dăk Lăk pơn jăt tai ai 32 anih pơrlòng mùl màl mờ 886 jơdŭ pơrlòng tàm 15 kơnhoàl, thị xã mờ ƀòn dờng. Tus tŭ do, UɃÑZ càr Dăk Lăk neh lơh geh Mpồl đơng lam pơrlòng kấp càr mờ đơng lam ală tiah lơh Mpồl đơng lam kấp kơnhoàl, thị xã mờ ƀòn dờng; lơh gơs ală zữ liệu, sền gròi, lơh niam wơl jơnau tơngit bơh cau pơrlòng di jăt tơngai geh ai; rơcang niam ală bơta bè phan bơna, cau lơh broă tus bal bơyai lơh dơ̆ pơrlòng... Mò H’ Yim Kđoh, Phó Củ tịc UɃÑZ càr Dăk Lăk, kung là Kwang atbồ Mpồl Đơng lam pơrlòng kấp càr sồr, ală kấp, ală gah lơh broă, ală tiah pal tơnguh broă pơgồp bal, rơcang bơ̆t bơtàu gùng dà broă pơrlòng mùl màl, gàr niam dơ̆ pơrlòng geh bơyai lơh lơngăp lơngai, geh cồng nha, nền nòn, di mờ kơrnoăt geh ai. Sền gròi rơlao tai tus mờ broă yal tơngit, yal mblàng bè dơ̆ pơrlòng. “Ai tơl di tŭ, yal di ală kơrnoăt yal tơngit geh kwơ gơrềng tus mờ dơ̆ pơrlòng. Kwơ màng, pal kah nền nòn gơwèt mờ ală hìu bơsram tàm tiah ngài, tiah kal ke geh tus mờ ală jơnau tơngit geh broă rơndăp lơh dong kờl nàng ală kơnòm geh tơl jơnau tơngit di tŭ rơcang nùs nhơm niam ngan ai dơ̆ pơrlòng do”.

Nam bơsram 2022-2023 tàm càr Dăk Lăk neh tơn jơh. Do kung là tŭ ală kơnòm bơsram mpồl ơdŭ 9 rơwah broă bơsram sră pơn jăt tai ai să tờm in. Pơrlòng mŭt bơsram ơdŭ 10 ală hìu bơsram krơi is, jào sră dan rơwah jăt tiah ơm kis ha là rơwah bơsram broă lơh là bơta geh sền gròi ngan. Gah bơto bơtê mờ bơsram càr Dăk Lăk kung gam lơh ngan ai broă rơwah kơnòm bơsram ơdŭ 10 mờ rơwah kơnòm bơsram tơnơ̆ mờ tŭ neh jơh bơsram kấp 2.

Hìu bơsram kấp 3 cuyên Nguyễn Du, ƀòn dờng Buôn Ma Thuột là dùl tàm ală hìu bơsram geh uă kơnòm bơsram rơwah nàng dan cih măt pơrlòng mŭt bơsram. Jăt broă rơndăp lơh geh ai, nam bơsram 2023-2024, hìu bơsram do geh rơwah 405 nă kơnòm bơsram ơdŭ 10, geh 9 ơdŭ cuyên mờ 2 ơdŭ ờ cuyên. Tơngai dờp sră dan pơrlòng geh bơh ngai 25 tus ngai 31 nhai 5. Ồng Nguyễn Đăng Bồng, Kwang atbồ Hìu bơsram kấp pe cuyên Nguyễn Du, càr Dăk Lăk pà git: “Kơnờm bơsram pal sơrlèt 2 dar, dar dơ̆ sơnrờp sền sră, ală kơnòm bơsram pal tơl 2 bơta: 1 là bơta jăk bơsram sră mờ nùs nhơm niam 4 nam bơsram pal bơh bơta jăk rơlao hờ đang mờ dơ̆ bàr là điểm jơh bơsram kấp bàr bơh ală kơnòm bơsram pal geh bơh bơta jăk rơlao hờ đang. Tŭ ală kơnòm bơsram geh tơl bàr bơta do den hơ̆ sồng ală kơnòm bơsram geh mŭt tàm dar dơ̆ bàr nàng pơrlòng 4 môn: Toán, Ngữ văn, Dà lơgar bơdìh mờ 1 môn cuyên”.

Kung jăt gùng dà broă rơwah kơnòm bơsram mŭt bơsram ơdŭ 10 nam bơsram 2023-2024 bơh càr Dăk Lăk dê, bal mờ Hìu bơsram kấp pe cuyên Nguyễn Du den ală Hìu bơsram kấp pe Zân tộk nội trú N’Trang Lơng mờ Hìu bơsram kấp pe Zân tộk nội trú Dam San kung geh ngui broă pơrlòng nàng rơwah sơl. Ală hìu bơsram kấp pe dà lơgar ndai ngui broă rơwah. Gam gơwèt mờ ală hìu bơsram kấp pe, hìu bơsram phổ thông geh uă kấp bơsram geh mpồl cau lơh is, rơwah kơnòm bơsram is tàm tơngu me Broă rơndăp lơh rơwah kơnòm bơsram bơh UɃNZ càr ai.

Gơwèt mờ ală kơnòm bơsram tơnơ̆ mờ tŭ neh jơh bơsram kấp bàr ờ tơl điểm nàng rơwah mŭt bơsram tàm ală hìu bơsramkấp pe den kung gam geh uă bơta rơwah tŭ ală anih bơto broă lơh tàm càr geh tơl di pal mờ jơnau kờñ geh bơsram broă lơh pơgồp bal mờ bơsram sră. Ồng Đỗ Trường Hiệp, Phó Kwang atbồ Sở Giáo dục mờ Đào tạo càr Dăk Lăk pà git: Khà rơwah kơnòm bơsram jơh bơsram kấp bàr tàm càr Dăk Lăk là uă ngan, geh tus 80%, tàm khà kờp jơh ală kơnòm bơsram ơdŭ 9 dê. “Gơwèt mờ ală kơnòm bơsram ờ tơl geh điểm nàng mŭt bơsram tàm ală hìu bơsram kấp pe, ală anih bơto broă lơh, giáo zụk thường xuyên den geh wèt gùng dà broă lơh ai ală kơnòm bơsram in, geh tus bal bơsram tàm ală hìu bơsram broă lơh, hìu bơsram trung kấp, kao đẳng mờ geh ală gùng dà lòt is. Den tàng, broă wèt jăt broă lơh tàm hìu bơsram geh lơh pràn nàng bơto sồr ai ală kơnòm bơsram in mŭt tàm rài kis mờ bơsram sră, ờ pal mìng geh mŭt bơsram kấp pe mờ geh ală broă bơsram ndai gơtùi bơsram niam mờ geh bơta niam ai rài kis tơnơ̆ do in”.

Tàm ală nam do, ală hìu bơsram kấp pe mờ Anih bơto broă lơh, Giáo zụk thường xuyên tàm càr Dăk Lăk pơgồp bal nền nòn tàm broă bơyai lơh bơto broă lơh ai kơnòm bơsram in. Pah nam geh di pơgăp 3 rơbô nă cau bơsram gah giáo zụk thường xuyên, bơh 30 rơbô tus 35 rơbô nă cau bơsram geh wèt broă lơh, bơsram broă lơh phổ thông di pal mờ bơta pràn, nùs nhơm kờñ gơboh bơh să tờm bal mờ jơnau kờñ bơh anih lơh broă dê. Broă lơh bơto sră pơgồp bal mờ bơto broă lơh tàm ală hìu bơsram broă lơh, Giáo zụk thường xuyên geh lơh, pơgồp bal niam tàm broă rơwah kơnòm bơsram tơnơ̆ mờ tŭ neh jơh bơsram kấp 2 jăt Rơndăp broă “Bơto broă lơh mờ ai gùng dà rơwah kơnòm bơsram tàm broă bơto bơtê kấp pe tơngai bơh nam 2018 tus 2025 dê”.