Nam bơsram do Hìu bơsram kấp bàr Võ Thị Sáu tàm xã Krông Na, kơnhoàl Buôn Đôn geh 349 nă kơnòm bơsram, tàm hơ̆ 80% kơnòm bơsram là cau kòn cau dùl ết nă cau. Tài bơh ală bơta lơh sa kal ke, uă mè bèp ai oh kòn in ơm rlô bơsram tơn nàng ơm tàm hìu lơh broă dong hìu bơnhă. Oh Y Jun Su Byă, kơnòm bơsram ơdŭ 9B, Hìu bơsram kấp bàr Võ Thị Sáu, kơnhoàl Buôn Đôn, càr Dăk Lăk pà gĭt: Lơh sa hìu bơnhă kal ke den oh pal rlô bơsram uă nàng lòt lơh broă. Tơnơ̆ tŭ geh cau pơgru tus pơndờm pơndiang oh pơnđơl lơh ngan nàng lòt bơsram tơl wơl tai.

Ndrờm bè hơ̆ sơl, tàm Hìu bơsram kấp dùl Y Jŭt, xã Krông Na, kơnhoàl Buôn Đôn, nàng gàr tơl khà kơnòm bơsram tus tàm ơdŭ là bơta ờ ƀuơn dùl ết lơi. Klau pơgru Nguyễn Tiến Chung, pơgru bơto tàm Hìu bơsram kấp dùl Y Jŭt, pà gĭt, broă lơh hòi jà kơnòm bơsram lòt bơsram tàm ơdŭ là dùl tàm ală kơnòl broă kwơ màng ndrờm bal mờ broă bơto bơtê. Tŭ geh kơnòm bơsram sang tĕ bơsram, cau pơgru atbồ ơdŭ pơgồp bal mờ Mpồl đơng lam Hìu bơsram dê lòt tus tơn tàm hìu bơnhă nàng tìp mat mờ mè bèp bal mờ kơnòm bơsram nàng gĭt ală bơta, nùs nhơm, bơta kơ̆p kờñ mờ hòi jà ală kơnòm lòt bơsram wơl. Klau pơgru Nguyễn Tiến Chung, đơs: Bơh broă lơh mblàng yal den tơngai bơh chờm ală oh lòt bơsram wơl uă đau, mơya dùl tơngai tơnơ̆ geh bàr pe dơ̆ bơsram den ơm rlô tai, bol añ pal lòt hòi jà tai. Tơngai lơi ală oh ơm rlô uă den lòt tus tàm hìu nàng hòi jà tai.

Jat ùr pơgru Trần Thị Hằng, Phó Kwang atbồ Hìu bơsram kấp dùl Y Jút, xã Krông Na, kơnhoàl Buôn Đôn, broă kal ke ngan rlau jơh ờ di là broă bơto bơtê  mờ là broă gàr tơl khà kơnòm bơsram tàm ơdŭ. Ngai bè ờs neh kal ke, tus nhai 11 nhai 12 sơlơ kal ke rlau tai tŭ mut tàm tơngai pĭc plai kơphê, ală kơnòm bơsram ơm rlô bơsram jat mè bèp lòt pĭc plai kơphê ơpah. Ală cau pơpgru pal lòt jòi lùp, trồ mang mŭt tus tàm suơn nàng jòi kơnòm bơsram. Pơgru Trần Thị Hằng, đơs: Hòi jà kơnòm bơsram là pal lòt tàm trồ mang, pơgap bơh 7 jiơ nggùl tus 8 jiơ mang hơ̆ sồng geh tìp hìu bơnhă. Oh kòn geh tŭ ơm bal mờ hìu bơnhă tàm mìr den bol añ kung pal pơnđơl lòt sơl. Kwang atbồ hìu bơsram, phó Kwang atbồ hìu bơsram, cau atbồ kông đoàn, đội, cau pơgru atbồ ơdŭ pal bal mờ gơ̆p mut bal tàm mìr nàng hòi jà kơnòm bơsram lòt bơsram wơl.

Kal ke là bè hơ̆, mơya tŭ ală oh lòt bơsram wơl tàm ơdŭ, ală cau pơgru gơ lơh chờ hờp, chờ hờñ ngan. Tài bơh ală cau pơgru gĭt mờ ală tiah rƀah kal ke bè tàm tiah nhàr lơgar Buôn Đôn, kờñ brồ guh lik klàs rƀah ờ geh broă lơh lơi ndai tai là pal bơsram sră, geh bơta gĭt wă rơ̆p tam gơl bơta sền gĭt, kơlôi sơnơng, tam gơl rài kis. Cau pơgru Phạm Thị Loan, Phó Kwang atbồ Hìu bơsram kấp bàr Võ Thị Sáu, xã Krông Na, kơnhoàl Buôn Đôn, đơs: Ală bơta lơh sa tàm ƀòn lơgar he, xã he dê lơh sa kal ke ngan, ù ro kơnrañ uă ngan kơnờm tàm tơngai mìu hơ̆ sồng gơtùi sih tăm phan mơya tơnhào phan tam phan den gơ jat tàm trồ tơngai. Bè hơ̆ den tŭ do ală sau pal gĭt sền akhar den tơnơ̆ do hơ̆ sồng dong ală sau geh rài kis niam.

Bal mờ broă hòi jà kơnòm bơsram tus hìu bơsram, ală hìu bơsram tàm xã tiah nhàr lơgar Krông Na, kơnhoàl Buôn Đôn neh hòi jà uă bơta pràn bơh mpồl bơtiàn nàng dong kờl kơnòm bơsram rƀah bè sră pơ àr, phan ngui bơto bơtê, rơndeh rơndồ lòt rê.... Kơnờm ală bơta pơndờm pơndiang bè gah phan bơna mờ nùs nhơm, uă kơnòm bơsram tàm tiah nhàr lơgar geh pơn jat tai jơnau kờñ lòt bơsram tàm hìu bơsram