Tàm kơnhoàl Lạc Dương, tàm nhai 11 do geh bơyai lơh 3 broă lơh lơh jat Festival bơkào Dà Làc dơ̆ 9 nam 2022. Ngan là, ngai 19/11, geh sơnđờm mŭt lơh Kàl lơh chờ Nhơ̆t phồng Lang Biang. Tàm do bơka 5 tờm chi bơka niam bơh ală anih nhơl chờ dê, mơkung lam lơh ală broă nhơl chờ bơh yau, broă lơh Team Building geh gơrềng tus rài kis niam chài mpồl bơtiàn kòn cau K’Ho dê. Ngai 26/11, tàm xã Dà Nhim geh bơyai lơh dơ̆ pơrlòng phan sa mờ tơrnờm Lang Biang dơ̆ 1, mờ bơta tus bal bơh 6 mpồl. Kung tàm dơ̆ do, tàm do geh bơyai lơh dơ̆ lơh chờ ơseh ntoăt pơrlòng ờ geh ừn dơ̆ 1, sac rơwah ơseh ntoăt pơrlòng bơh 6 xã, thị trấn mờ ală mpồl lơh sa kă bro tàm ù tiah do dê. Ồng Sử Thanh Hoài, Củ tịc Ủy ƀan Ñân zân kơnhoàl Lạc Dương, càr Lâm Đồng pà gĭt: broă lơh rcang bơyai lơh 3 broă lơh lơh jat Festival bơkào Dà Làc dơ̆ 9 nam 2022 sền bal là neh lơh sir.

Ồng Sử Thanh Hoài, đơs: Lơh jat gùng dà broă lơh bơh Ủy ƀan Ñân zân càr dê bè broă ală tiah tàm càr pal tus bal ală broă lơh nàng lơh jat Festival bơkào Dà Làc dê, kơnhoàl Lạc Dương kung geh bàr pe broă lơh nàng lơh jat bal. Hơ̆ là kàl lơh chờ nhơ̆t phồng kờp dŭ geh sơnđờm mŭt lơh tàm ngai 19/11, lơh bal mờ hơ̆ là kơnhoàl Lạc Dương kung bơyai lơh dơ̆ pơrlòng phan sa, dròng cing jañ mồng, pơgồp bal mờ ală mpồl lơh sa kă bro bơyai lơh dơ̆ lơh chờ ơseh ntoăt pơrlòng ờ geh ừn tàm xã Dà Nhim.

Tŭ do, ală anih drơng broă nhơl chờ bè hìu drơng broă ñô sa, hìu ơm rlô, tiah tus sền nhơl chờ... tàm Lâm Đồng kung neh rcang ală bơta kờñ pal geh nàng lơh niam broă drơng broă niam ngan jơnau kờñ bơh năc dê. Ồng Đinh Thiên Long, cau tờm dùl hìu drơng broă ñô sa ƀòn dờng Dà Làc pà gĭt, nàng lơh jat Festival bơkao Dà Làc dơ̆ do, bơdìh mờ tơnguh uă bơta niam drơng broă, hìu drơng broă ñô sa bơh ồng dê neh ngan ngồn rcang lài bàr pe phan sa bơkah pơn rơ mờ mùl gŏ ngan geh trŭ gơm bơh ală biăp, bùm plai đo cèng bơta krơi is bơh ƀòn dờng Dà Làc dê. Ồng Đinh Thiên Long, đơs: Lài mờ tŭ bơyai lơh Festival bơkào den broă sơn rờp ngan là bol añ lơh sir bơta kwơ dờng màng bơh dùl hìu drơng broă ñô sa dê bè bơta niam drơng broă ala, bè kloh niam, sền gàr niam phan ngui sa nàng wă dùl mpồl uă ngan năc lòt nhơl in. Dà Làc geh ală phan trŭ gơm phan sa uă mờ li la ngan, den tàng bè hơ̆ añ kơ̆p kờñ là năc geh sền gĭt bè bơta niam chài phan sa bơh làng bol ƀòn dờng bơkào dê.

Ồng Tôn Thiện San, Củ tịc Ủy ƀan Ñân zân ƀòn dờng Dà Làc, Kwang atbồ Mpồl bơyai lơh Festival bơkào Dà Làc dơ̆ 9 pà gĭt, ală ƀòn bơkào, ù tiah bơkào tàm Dà Làc sùm gàr tơl bơta niam hèr ngan, drơng broă niam ngan jơnau kờñ sền bơh năc in. Ồng Tôn Thiện San, đơs: Dà Làc đơs nền ờ mìng là Festival bơkao hơ̆ sồng geh bơkào ờ, mờ Dà Làc là ƀòn dờng bơkào den bơkào sùm geh gùt nam, cau lơi kung tam bơkào, hìu lơi kung tam bơkào lơm. Ală ƀòn bơkào nam do kung gam geh bơkào drơng broă năc lòt sền in, pơn yơu bè ƀòn bơkào Vạn Thành gơtùi lòt sền tàm trồ mang. Bàr pe broă lơh Festival bơkào geh jŏ jòng tus tơngai sa tềp, ndrờm geh broă rơndap lơh tam gơl bơkào sùm mờ bơkào sùm niam hèr. Den tàng bè hơ̆, bơdìh mờ broă “Đăng trồ Tây Nguyên” jŏ jòng, ală ù tiah bơkào kung geh tơn jŏ tus tơngai sa tềp.

Kung bè ală dơ̆ Festival bơkào lài, Festival bơkào Dà Làc dơ̆ 9 wèt tus jơnau kờñ mpồl bơtiàn lơh bal, den tàng uă ngan ală broă lơh geh ală mpồl lơh sa kă bro, mpồl cau, cau dùl nă să is dan bơcri priă lơh. Jat ồng Đặng Trí Dũng, Phó Củ tịc Ủy ƀan Ñân zân càr Lâm Đồng, Phó Kwang atbồ Mpồl đơng lam broă lơh Festival bơkào Dà Làc yal, tus tŭ do ală broă lơh ndrờm geh lam lơh niam, di tŭ, gàr niam dùl dơ̆ Festival bơkào niam ngan mờ lời wơl uă bơta kah wơl niam bơnĕ tàm nùs nhơm năc lòt nhơl in. Bơh hơ̆, pơgồp bơnah lơh pràn broă lơh gơ hòi gơ jà nhơl chờ mờ tơnguh uă bơta niam rài kis niam chài mờ nùs nhơm bơh làng bol tàm tiah do in.

Ồng Đặng Trí Dũng, đơs: Tus tŭ do den neh lơh di pal jat ală jơnau sồr kung bè broă rơndap lơh geh ai, jơh bal bè tŭ tơngai, tơngume mờ broă lơh rcang lài ndrờm lơh gơs lơm. Mpồl đơng lam, Mpồl bơyai lơh mờ 4 mpồl dềt ndrờm lam lơh broă lơh jơh nùs ngan. Festival bơkào nam do mờ nùs nhơm bal là lơh làm uă, geh ală tơngume tơnơ̆ dơ̆ bơyai lơh Festival den pơn jat tai ngui mờ drơng broă; mơya geh ală tơngume, pơn yơu bè broă lơh lòt sền đơs crih tam ya den gơ lời wơl tàm nùs nhơm năc lòt nhơl in ală bơta niam bơnĕ bè Dà Làc, bè càr Lâm Đồng, bè kòn bơnus, bè ală phan bơkah pơn rơ tàm hơ̆ geh bơkào.

Mờ tơngume “Dà Làc- ƀòn dờng poan kàl bơkào” Festival bơkào Dà Làc dơ̆ 9 nam 2022 geh bơyai lơh bơh nhai 11 tus nhai 12 mờ ù tiah geh lơh làm uă gùt ală kơnhoàl, ƀòn dờng tàm càr dê. Bal mờ 9 broă lơh tờm, tàm hơ̆ geh: ù tiah bơkào, broă lơh đơs crih tam ya “Bảo Lộc- Bô bơkah cê, bơta niam brài bơrteh”, broă lơh đơs crih tam ya kwơ màng yal Festival bơkào Dà Làc dơ̆ 9 nam 2022; ràng tơlik phan soh “Biài- gùng lòt phan lời wơl kah yau” mờ Ù tiah ràng tơlik “Đăng trồ Tây Nguyên”, ràng tơlik bơkào mờ tờm chi geh bơkào dunia dê, pơrjum lam lơh Broă lơh lơh broă bơh Cíñ phủ lơh jat Nghị quyết sồ 23 bơh Ƀộ Cíñ trị dê bè gùng dà broă lơh bơtàu tơnguh lơh sa- mpồl bơtiàn, gàr niam broă sền gàr dà lơgar, sền gàr lơngap lơngai tiah Tây Nguyên tus nam 2030, broă rơndap lơh tus nam 2045 mờ hòi jà bơcri priă tàm tiah Tây Nguyên.