Drim ngai 04/11, Tỉñ ủy Gia Lai bơyai lơh Pơrjum tơn jơh 5 nam lam lơh broă lơh bơtàu tơnguh gah nhơl chờ tàm càr. Pơrjum neh ai tơlik jơnau kờñ tus nam 2025, Gia Lai rò 2 tơlak 100 rbô dơ̆ nac, kờp jơh priă lơh geh bơh nhơl chờ geh 1 rbô 400 tơmàn đông. 5 nam do, khà bơtàu tơnguh nhơl chờ tàm Gia Lai geh bơta tam gơl loh làng ngan, priă lơh geh mờ khà nac nhơl chờ kơ̆ kơljap sùm jat pah nam.

Tơngai bơh nam 2017 tus nam 2021, kờp jơh priă bơcri bơt bơtàu phan bơna nhơl chờ rlau 245 tơmàn đông, tơrgùm tàm ală anih nhơl chờ kuơmàng gơtùi ngui mhar. Tơngai bơh nam 2022 tus nam 2025, Gia Lai ai tơlik lài gùng dà bơtàu tơnguh nhơl chờ kơ̆ kơljap bơh bơtàu tơnguh phan bơna nhơl chờ, bơta ƀuơn nàng lơh gơlik bơta tờm, bơta tiơng pơn rơ ai nhơl chờ Gia Lai in, bè: Rơndap broă lơh tiah nhơl chờ Biển Hồ- Chư Đang Ya, tiah nhơl chờ brê bơnơm ñrùh dà Phú Cường, tiah nhơl chờ brê dà lơgar Kon Ka Kinh tiah sền gàr brê bơnơm phan geh is Kon Chư Răng, tơnau dà Ayun Hạ, tơnau dà hìu măi pờ tơlik ồs đèng Sê San 4- Thác Mơ. Lơh ală broă lơh nhơl chờ mpồl bơtiàn, nhơl chờ ƀòn lơgar.