Tàm hơ̆, Mpồl Cữ thập đỏ ală kâp càr Gia Lai lơh ngan drơng gàr, dong kờl ai 25 rbô nă cau in, mờ kờp jơh priă lơh broă 15 tơmàn đong. Srơh “Sa tềp kờñ gơboh kòn bơnus Sơnam pa Qúy Mão 2023” rơ̆p geh lơh bơh ngai 01/01/ 2023 tus ngai 16/01/2023 hơ̆ là bơh ngai 10- 25 nhai 12 nam he Ñâm Zần. Srơh hòi jà tă pơgồp jơh ală bơta pràn bơh mpồl bơtiàn dê nàng bơyai lơh ală broă “Pà phan- Chờ sa tềp” nàng kờñ dong kờl bè phan bơna, nùs nhơm nàng cau rƀah, cau geh rài kis kal ke in geh chờ hờp wă rò sơnam pa, sa tềp, pơgồp bơnah bơ̆t bơtàu ƀòn lơgar tam klăc, bềng nùs nhơm kờñ gơboh kòn bơnus. Ală broă lơh bơh Srơh “Sa tềp kờñ gơboh kòn bơnus” geh rơndăp lơh dipal mờ adat bơhiàn mờng kwèng rài kis niam chài mờ bơhiàn bơh yau làng bol dê. Srơh ngui niam mpồl lơh broă dong kờl tàm ƀòn lơgar nàng jơh tơl nă làng bol in tơngŏ kơnòl mờ mpồl bơtiàn bơh he dê gơwèt mờ cau rƀah, cau geh rài kis kal ke.