Gia Lai geh ală gùng che đèng 500 Kilovon mờ 220 kilovon jòng mờr 800 kơi sồ, lòt gan uă tiah geh bă mìr bơh làng bol kòn cau dùl êt nă cau dê. Kơnờm bơh sùm geh mblàng yal bè sền gàr niam lơngăp lơngai kềng gah gùng che đèng den tàng làng bol geh bơta gĭt wă geh kơnòl loh làng ngan, tàm sơm băt tê bal mờ gah lơh đèng sền gàr niam lơngăp lơngai jrong đèng mờ gùng che đèng. Bi Rmah Chơn là làng bol ơm tàm ƀòn Breng 2, xã Ia Dêr, kơnhoàl Ia Grai, càr Gia Lai geh 2 lồ kơphê rềp tềng gùng che đèng 500 kilovon pà gĭt: Añ geh bă mìr kơphê tềng hơđơm gùng che đèng, să tờm añ mờ hìu bơnhă sùm lơh jăt ală jơnau sồr bè sền gàr niam lơngăp lơngai kềng gah gùng che đèng. Bơh hơ̆ añ mờ hìu bơnhă kung mblàng yal ai làng bol tàm ƀòn in ờ gŏ di lơh ală broă bè tung kơñau, ală hìu geh mìr kơphê, tờm chi tam tềng hơđơm kềng gùng che đèng den pal sùm lơh jăt ală jơnau sồr bè sền gàr lơngăp lơngai kềng gah gùng che đèng.

Bè đah Pờ jùn đèng Gia Lai, là mpồl sùm lòt sền niam lơngăp lơngai tàm jơh ală gơl gùng che đèng, bơcri priă blơi măy gơ par UAV nàng tơnguh uă cồng nha sền swì, lơh sàng goh suàn gùng che lơh bal mờ tê mờ ngui măy mok Hotline nàng tơrmù ƀà tŭ jiơ tơn chơ̆t đèng. Kwơmàng là tàm ală trạm ƀiến áp, kông ñân viên mờ cau lơh broă bơh anih lơh do dê sùm lơh jăt niam tŭ jiơ jàu lơh broă, lơh sàng goh sền gàr phan, bơsong ală jơnau tơngŏ ờ bè ờs bơh măy mok phan bơna dê. Bi Trần Văn Trang, Cau ătbồ dơ̆ lơh broă tờm bơh trạm ƀiến áp 500 kilovon Pleiku 2, Jun đèng càr Gia Lai dê đơs: Tàm tơngai do jun pờ ală gùng che đèng ƀiến áp uă ngan, mìng là rlau 80 tus 90% lơm den tàng oh mi dơ̆ lơh broă sền gròi ngan broă do mờ pal jăt sền ngan. Tŭ pờ uă den pơhìn lơh gơrềng tus măy mok phan bơna, rơ̆p lơh gơtìp ồs sa măy mok mờ lơh gơlik jơnau rềs àr tàm ală tŭ pờ ngui. Tŭ do, tàm ală măy tíñ ndrờm mpờl jơh lơm, dơ̆ lơh broă gơtùi sền bơh ală măy tíñ mờ sền jơh ală bơta lơh broă bơh măy mok dê. Jơh ală broă lơi ndrờm pơyua tàm măy tíñ den tàng broă pờ ngui rơ̆p geh jăt sền mhar rlau, sền swì gŏ mhar rlau.

Jăt ồng Trần Khánh Trung, Phó Kwang ătbồ Jun đèng Gia Lai yal, bal mờ 783 kơi sồ gùng che đèng 220 kilovon mờ 500 kilovon, mpồl gam kong kơnòl ătbồ pờ ngui 2 trạm ƀiến áp 500 kilovon, 1 trạm ƀiến áp 220 kilovon. Mpồl neh lam lài ngui măy mok sồ, bơcri priă blơi măy mok pa jak chài ngui tàm ală tŭ ătbồ mờ pờ ngui. Bơh hơ̆ tơrmù geh uă ngan priă tă lơh mờ tơnguh uă cồng nha lơh broă. Ồng Trần Khánh Trung, đơs:

Tàm nam 2022, Kông ty jun đèng 3 là mpồl lam lài tàm tổng kông ty neh bơyai lơh geh cồng nha ngui măy par UAV tàm broă lơh ătbồ pờ ngui gùng che đèng jun đèng. Jơnau kơlôi sơnơng lơh ală anih ătbồ trạm ƀiến áp mờ măy ngăc ngar nàng ngui niam ngan rlau jơh, tơrmù ală broă lơh ai cau lơh broă pờ ngui in. Ală jơnau kơlôi sơnơng do tŭ ngui tàm broă lơh den neh lơh tam gơl gùng dà lơh broă bơh mờ tê tus ngui măy mok yal tơngĭt jơnau lơh gơlik geh cồng nha ai broă lơh tam gơl sồ tơngai bơh nam 2021- 2025 bơh Tổng Kông ty Jun đèng Dà lơgar in đơs bal mờ bơh Kông ty Jun đèng 3 dê đơs is.