Gơnoar ătbồ mờ làng bol càr Dăk Lăk gơn kơnờm ală gùng dà, broă lơh krơi is do geh gơ gơs là tŭ tơngai niam uă ngan, phan ngui dong kờl, dong càr gờñ lơh geh jơnau kờñ gơ gơs là tiah tờm tiah drà tiah Tây Nguyên dê jăt jơnau cih tàm Kơrnoăt 67 bơh Ƀộ Cíñ trị dê.

Jăt Sở Văn hoá, Thể thao mờ Zu lịc càr Dăk Lăk, đơs: Kơrnoăt geh ring bal neh pơn jăt bal ală jơnau cih lơh tơrlòng lài bàr pe gùng dà broă lơh krơi is gơwèt mờ ƀòn dờng Buôn Ma Thuột, càr Dăk Lăk bè ătbồ priă jền, kes priă dà lơgar; jàu kâp ătbồ dà lơgar tàm broă rơndăp ù tiah; ai lài dong kờl gơhòi gơ jà bơcri priă; ai lài dong kờl gơwèt mờ cau mờng chài tàm broă lơh, cau jak chài mờ cau geh bơta jak krơi is. Dùl ngai bal, tàm dơ̆ pơrjum ờs mờng nhai 10 tơn bơh Ủy ƀan Ñân zân càr Dăk Lăk dê, ồng Phạm Ngọc Nghị, Củ tịc Ủy ƀan Ñân zân càr Dăk Lăk neh sồr ală sở, ngàñ ală tiah tàm càr kơlôi sơnơng sền swì ală gùng dà broă lơh krơi is pa geh Quôk hội ring bal nàng ƀòn dờng gờñ lơh jăt gơnoar broă, kơnòl broă ătbồ dà lơgar mờ gơnoar ătbồ tiah drà, drơng làng bol in niam rlau.