Hợp ták xã lơh sa suơn sre kông nghệ kao tam klăc bal Farm bơh bi Tô Linh Bình, 29 sơnam lơh Cau đơng lam Mpồl duh broă Atbồ mơkung là Kwang atbồ geh anih lơh broă tàm thôn 5, xã Hà Mòn, kơnhoàl Đăk Hà, càr Kon Tum. Mơya Hợp ták xã den geh ù tiah lơh sa tàm uă tiah tàm càr dê, bè: Đăk Hà, Ngọc Hồi, Đăk Tô, Kon Rẫy, Sa Thầy, ƀòn dờng Kon Tum mờ geh tŭ geh bal tàm càr Gia Lai tai sơl. Nàng tơn jơh bơta ngài bè ù tiah, lơh geh bơta lơh bal, tàm yal tơngĭt bal niam đah ală cau tàm mpồl dê, bi Tô Linh Bình pà gĭt, jơh 30 nă cau tàm mpồl ndrờm pal gĭt ngui bè kông nghệ thông tin. Bi Tô Linh Bình đơs: Kông nghệ thông tin cèng tus bơta kwơ loh làng mờ ờ gơtùi ờ geh tàm broă lơh sa suơn sre. Ală gơ̆p bơyô ơm tàm tiah ngài tàm tơrbŏ bal mờ Zalo, Facebook, den hơ̆ là bơyai lơh ală mpồl tàm điện thoại, tàm pang dùl să is dê. Lơh pang Fanpage là nàng sền gĭt sùm ală rùp hin, ală jơnau yal, video hìu suơn dê nàng làng bol in mut bal tam pà bơta mờng chài.

Jat bi Tô Linh Bình, bi jơh nùs lơh ngan jòi tus mờ broă lơh sa suơn sre sàng goh là tài bơh sền gĭt bơta geh ngan bơh să tờm dê, tŭ crơng gơs hìu bơnhă pal kis tàm suơn tam plai chi ƀô uă ngan sơnơm sền gàr phan tam. Tŭ neh geh gùng lòt pa, bi lơh gơ kờñ ai uă hìu bơnhă làng bol cau lơh broă sa in, lơh gơlik dùl gùng dà lơh broă sa suơn sre sàng goh nàng sền gàr să jan he dê mờ sền gàr mpồl bơtiàn. Tŭ do, 30 nă cau tàm mpồl Hợp ták xã lơh sa suơn sre kông nghệ kao tam klăc bal Farm gam tam rlau 50 lồ kơphê, rlau 70 lồ sầu riêng bal mờ gĭt nđờ jơ̆t lồ tờm chi sa plai, lơh jat niam ngan broă tam phan hữu kơ siñ học. Jơnau yal bè suơn chi bơh tơl nă cau tàm mpồl Hợp ták xã dê sùm geh yal tàm mpồl. Tềng đap ală broă gơlik geh bè kòp tu aniai, tờm chi geh tềl tơngŏ ờ niam nisơna den cau tàm mpồl ndrờm dờp geh bơta bơto pơlam, dong kờl di tŭ bơh ală cau geh bơta mờng chài tàm Hợp ták xã dê.

Bi Lê Quốc Hòa, hìu ơm tàm thôn 2, xã Đăk Ui, kơnhoàl Đăk Hà pà gĭt, bơta kwơ màng ngan bơh ală cau tàm mpồl Hợp ták xã dê là gơtùi dờp geh bơta dong kờl bơh ngài mờ khat dùl tŭ lơi tơn. Bi Lê Quốc Hòa, đơs: Añ tam 2 lồ sầu riêng tàm bơrlŭ bal mờ tờm pơnat. Lơh bè siñ học den sền gŏ niam mờ rềp mềl mờ tiah ơm kis. Bơh tàm màng xã hội mờ mpồl is Hợp ták xã dê tai den oh mi tìp mat lơh kuèng ƀuơn ƀoài ngan. Uă tŭ he geh bơta lơi den hòi bơh tàm Facetime he cribơyai bal tàm hơ̆. Kờñ tŭ lơi den he hòi tàm dùl mpồl hơ̆ den tŭ lơi oh mi kung jơh nùs dong kờl di tŭ.

Tŭ do ală phan bơna kơphê, sầu riêng bal mờ bàr pe bơta plai chi bơh Mpồl tam klăc Farm dê ờ tơl tăc tàm drà kă bro.

Neh bal mờ gơ̆p sơr lèt gan tơngai kal ke, ală cau tàm mpồl Hợp ták xã tŭ do den gam tàm klăc bal pơn jat tai lơh jat ală broă rơndap lơh niam ngan mờ uă rlau tai ai broă lơh lơh sa suơn sre hữu kơ. Tềng đap mat Hợp ták xã pờ ơnàng bă ù tuh dà is, mơkung cih mat dan mã sồ tiah tam phan nàng phan bơna in gơtùi tăc tàm uă tiah rlau. Bal mờ hơ̆ ngui kông nghệ sền gĭt broă sơng ka sền gàr, jat sền bơta gơlik geh tơl suơn chi dê nàng cau ngui sa in ƀuơn ƀoài jòi gĭt tiah tờm lơh gơlik, tơnguh bơta niam bơh tơl phan bơna dê. Đơs bè cau lam bồ, bơto pơlam ai Hợp ták xã lơh sa suơn sre kông nghệ kao tam klăc bal Farm Tô Linh Bình dê, bi A Xây, Phó Ƀí thư Thường trực Tỉñ đoàn Kon Tum pà gĭt: Tàm broă lơh sa suơn sre sàng goh, tơlir Tô Linh Bình geh uă broă lơh, uă bơta bơtàu tơnguh mờ ngan là geh bơta tam pà bal mờ đoàn viên ơruh pơnu, lơh geh broă lơh ai đoàn viên ơruh pơnu kal ke in. Tàm ală nam pa do bi Bình kung neh dờp geh uă khà jờng.

 Nam 2022, mờ Hợp ták xã lơh sa suơn sre kông nghệ kao Mpồl tam klăc bal Farm pa mờ geh cồng nha, bi Tô Linh Bình dờp geh bơta chờ hờp dờng mờ khà jờng Lương Định Của lời ai cau lơh broă sa kơnòm să in- cau lơh sa kă bro sơn đờm mut lơh broă lơh sa suơn sre jak ngan gùt lơgar. Kung tàm nam 2022 bi Tô Linh Bình geh Ủy ƀan Ñân zân càr Kon Tum pà sră jờng rơ Krơh niam cau kơnòm să pơn rơ jak càr Kon Tum gah lơh sa, lơh sa kă bro.