Deh mờ dờng tàm hìu bơnhă geh rài kis kal ke ơm tàm xã tiah sar lơgar ngài Dà Knàng, kơnhoàl Dam Rông, càr Lâm Đồng, Ka Huệ pal ơm rlô bơsram tŭ mŭt bơsram ơdŭ 11,  ơm tàm hìu lơh broă dong mè bèp. Tàm sơnam 17 “là sơnam pa tàu dờng” ùr ơruh Ka Huệ bềng nùs nhơm kờñ tàm broă lơh sa kung bè tus bal lơh broă mpồl bơtiàn.

Tàm xã Dà Knàng ù tiah, trồ tiah gơ dờp mờ tờm prìt bơkah pơn rơ Laba. Pe nam lài, Hợp ták xã prìt Laba Dà Knàng geh lơh tàm tiah do, Ka Huệ lời rlau 5 rơbô thơk vuông ù nàng tam prìt lơh bal mờ Hợp ták xã. Kung tàm tơngai do, Ka Huệ mŭt lơh kông ñâñ tàm Hợp ták xã, mờ priă lơh geh pah nhai 7 tơlak đong. Bi gam hòi jà tai 4 nă ơruh pơnu làng bol kòn cau dùl ết nă cau tàm xã mŭt lơh bal tàm Hợp ták xã, mờ geh priă sùm. Bơdìh mờ tŭ jiơ lơh broă tàm Hợp ták xã, là Ƀí thư Ci đoàn thôn Pul, Ka Huệ lời tŭ ru tơrgùm ơruh pơnu tàm ƀòn tus pơrjum bal nàng mblàng yal ală gùng dà broă lơh bơh Đảng, adat boh lam dà lơgar, mơkung lam lơh ală broă lơh bơtàu tơnguh lơh sa geh cồng nha.

Ka Huệ bal mờ kơnòm dềt thôn Pul

Bi Ka Huệ đơs: Tàm broă lơh mblàng yal den bol añ sùm ngui ală jơnau bơto tơngkah bơh cau dờng sơnam dê lời ai rơnàng kơnòm să in. Bơh hơ̆, bol añ rơ hời tus bal mờ ală cau là ơruh pơnu tàm thôn jat broă lơh “mìu ñhàc den sù jŏ”. Jòi tơl broă lơh nàng tơrgùm ală ơruh pơnu tàm thôn in tàm klăc bal, sền gròi lơh sa, pleh lơh broă tìs mờ adat boh lam. Pah dơ̆ lồi nhai, Đoàn ơruh pơnu lam pơrjum dùl dơ̆ nàng tă pơgồp jơnau đơs, yal tơngĭt ală broă lơh geh cồng nha ngan ngồn ai ală đoàn viên in. Bè să tờm añ pal lam lơh geh cồng nha lài mờ sền gŏ geh cèng wơl priă lơh geh uă halà ờ den añ geh yal tơngĭt wơl ai đoàn viên in lơh jat. Tàm do den bol añ gam lam lơh broă lơh tàm tờm zơu, mờ tŭ do tàm tơl sào ù tam zơu mờ ròng tu lơh geh pơgap bơh 7 tus 10 tơlak đong pah nhai.

Là ùr Ƀí thư Ci Đoàn ơruh pơnu ngăc ngar, Ka Huệ gam là cau lơh broă gah lơh sơnơm tàm thôn, ƀòn, mơkung là dùl nă cau lơh broă bal gah khà kờp làng bol jak ngan. Thôn Pul, xã Dà Knàng geh 129 hìu bơnhă mờ pơgap 80% là làng bol kòn cau K’ho. Tài bơh ơm tàm tiah sar lơgar ngài den gam geh uă bơhiàn yau bơrngơl gơla. Ka Huệ neh lơh ngan mblàng yal nàng làng bol in tơn jơh ală bơhiàn yau bơrngơl gơla, bè: bau kơnòm să, bau mờ cau pròc mhàm bal, tơnguh uă bơta gĭt wă rcang sơndră kòp, sa sin hùc duh, sàng goh tiah ơm kis.

Ka Huệ tus bal “Ngai rơlô tơlir”

Bi Ka Huệ đơs: Añ là Ƀí thư Ci đoàn thôn Pul, mơkung lơh broă gah khà kờp làng bol. Lài do ờ hềt lơh broă gah khà kờp làng bol, ờ hềt geh bơto pơlam, ờ hềt geh mblàng yal den bơta bau kơnòm să, bau mờ cau pròc mhàm bal uă ngan tàm tiah do, bè: bau mờ kòn kồñ kòn mây mờ kơlôi là nàng ờ lơh roh jơi nòi. Mơya bơh tŭ lơh broă mblàng yal, bơto pơlam ai làng bol in geh lơh pràn den bơta do neh ờ hoan geh mờ gơmù uă ngan. Ơruh pơnu bau mờ kòn cau ndai bè Yoan, cau Cil mờ ală jơi bơtiàn kòn cau ndai... Ờ gam geh bơta deh kòn dơ̆ 3, dơ̆ 4 bè lài tai, mờ tŭ do làng bol neh gĭt deh kòn  gĭt kơrhia tam hìu bơnhă mìng deh 2 nă lơm nàng ƀuơn ròng siam oh kòn gư in niam. Tŭ gơlik geh kòp aniai, hòi jà làng bol lòt cĭt vaccine rcang sơndră kòp den làng bol sùm lơh jat.

Mờ bơta lơh ngan pơn đơl pràn ngan, nùs nhơm kơ̆ dơn cíñ trị kơ̆ kơljap, bồ nam do, Ka Huệ chờ hờp ngan geh tơmŭt Đảng Kộng sản Việt Nam. Mò Mbon K’ Thơm- Phó Củ tịc Ủy ƀan Ñân zân xã Dà Knàng, kơnhoàl Dam Rông, càr Lâm Đồng pà gĭt: Tàm ală nam pa do, Ka Huệ neh rcang pơgồp bal mờ ală ƀan, ngàñ tàm thôn, xã lơh pràn broă lơh mblàng yal, yal tơngĭt ală bơta gĭt wă pa ai làng bol tàm ƀòn lơgar in nàng tam gơl broă kơlôi broă lơh. Ngan là mblàng yal tơn jơh bơhiàn bau mờ cau pròc mhàm bal. Lam lơh broă rơndap lơh bơt bơtàu ƀòn lơgar pa tàm thôn, ƀòn, să tờm Ka Huệ  kung bè thôn Pul neh tă pơgồp uă ngan, pơgồp bơnah ai xã Dà Knàng lơh sir broă lơh ƀòn lơgar pa.

Mò Mbon K’ Thơm, đơs: Ka Huệ là dùl nă cau Đảng viên kơnòm să, ñhăp nhar, kờñ bơsram bơta mờng chài, là dùl nă Ƀí thư Ci Đoàn den Ka Huệ sùm lơh krơh niam ngan tàm broă lơh sa hìu bơnhă ai đoàn viên ơruh pơnu tàm thôn, xã in, lam lơh bơyai lơh ală srơh tàm thôn, ƀòn den Ka Huệ sùm lơh niam ngan. Xã kung sền gĭt do là ùr đoàn viên geh bơta jak chài nàng pơn jat tai bơsram tàp, bơto bơtê nàng bơtàu tơnguh rlau tai tàm ùr đoàn viên ơruh pơnu đơs bal mờ ùr đoàn viên ơruh pơnu làng bol kòn cau dùl ết nă cau đơs is.

“Tiah lơi kờñ geh ơruh pơnu, tiah lơi kal ke den geh ơruh pơnu”. Jơnau bơto bơtê hơ̆ bơh Ƀák Hồ dê neh geh rơnàng kơnòm să tàm tiah sar lơgar ngài Dà Knàng, kơnhoàl Dam Rông, càr Lâm Đồng cih kah nàng lơh jat. Tàm hơ̆, să tờm Ka Huệ- Ƀí thư Ci đoàn ơruh pơnu thôn Pul, xã Dà Knàng là dùl nă cau pơn jak. Broă lơh lơh ngan bơh bi dê neh pơgồp bơnah kwơ màng lơh tam gơl bơta kơlôi sơnơng, broă lơh ai rơnàng kơnòm să tàm tiah sar lơgar ngài in.