Tàm dơ̆ tìp măt, ală kwang bàng neh neh geh yal bè bơta tơngit tàm dunia mờ tàm tiah do, ală cồng nha geh pơnrơ ngan bè tàm broă tơnguh bơtàu lơh sa càr Dăk Lăk dê nam 2022, gùng dà tơnguh bơtàu nam 2023 mờ ală nam pơn jăt tai. Nam 2022, broă lơh sa mpồl bơtiàn càr Dăk Lăk neh brồ guh wơl pràn mờ lơh geh ală cồng nha tơl ală bơta tàm uă gah broă.

Jơh ală jơnau kờñ mìng jăt Nghị quyết geh ai neh lơh geh tơl. Nam 2023, càr Dăk Lăk lơh ngan gơguh lơh sa di pơgăp 8% pơn drờm mờ kờp dŭ lơh jăt nam 2022. Đơs tàm dơ̆ tìp măt, ồng Võ Văn Cảnh, Phó Củ tịc UɃÑZ càr Dăk Lăk đơs tờm: nàng lơh geh ală cồng nha do, bơdìh mờ broă lơh ngan, bồ tơngoh lơh ngan uă, tàm broă đơng lam, lam sồr, lơh jăt kơnòl bơh ală kấp ủy, gơnoar atbồ, làng bol bal mờ mpồl ling càr dê. Mờ kwang đơng lam càr kơ̆p kờñ pơn jăt tai dờp geh broă sền gròi uă rơlao tai bơh ală kwang bàng kấp dờng ling klàng dê nàng càr Dăk Lăk gờñ lơh gơs ală jơnau kờñ tơnguh bơtàu lơh sa mpồl bơtiàn bè neh ai.