Di tờm 8 jơ drim, dơ̆ ies ƀồc ồng Vũ Khoan geh bơyai lơh nền nòn, nàng tơlik nùs nhơm kah kơlôi mờ dờp ală cồng nha neh lơh geh bơh ƀồc ồng Vũ Khoan dê. Lài ngan tàm dơ̆ ies, Mpồl kwang bàng tàm Ƀan Cấp hành Đảng dà lơgar, Mpồl Quốk hội, Mpồl Củ tịc lơgar, Mpồl Cíñ phủ, Mpồl Ủy ƀan Mặt trận Dà lơgar Việt Nam geh ală kwang đơng lam kấp dờng lơgar he lam bồ neh mŭt ies.

Tus ies ƀồc ồng Vũ Khoan gam geh ală kwang bàng đơng lam Đảng, Dà lơgar lài do, mpồl kwang bàng ala măt ală ƀộ, gah lơh broă dà lơgar, mpồl kwang bàng Dà lơgar bal mờ ală càr, ƀòn dờng; ală mpồl kwang bàng lơh broă lơgar ndai, gơ̆p bơyô dunia. Ƀồc ồng Vũ Khoan, Kwang đơng lam neh geh broă pơgồp bal kwơ màng tàm broă pờ geh mpồng tơrgùm bal, tam gơl pa mờ tơnguh bơtàu dà lơgar. Ồng neh lời wơl ală broă mờng chài kwơ màng ngan, bơ̆t bơtàu bơta niam cri bơyai broă mờ lơgar ndai lơh sa dunia tơnơ̆ do in. Dơ̆ ntrờn ƀồc ồng Vũ Khoan geh bơyai lơh tàm tŭ 1 jơ 30 phút mờ tơ̆p geh bơyai lơh tàm 3 jơ mho ngai bal tàm ƀlàng tơ̆p ƀồc Mai Dịch, ƀòn dờng Hà Nội.