Tus tŭ do, kờp jơh khà priă bơcri ai ală broă lơh nhơl chờ lòt sền broă lơh sa suơn sre bơh càr Lâm Đồng dê pơgap 377 tơmàn đong, tàm bă ù ơnàng rlau 300 lồ. Tàm hơ̆, geh 212 lồ ù lơh sa suơn sre, 9 lồ ù bơt bơtàu, gam wơl là bă ù ndai.

Pơrjum đơs nền, Lâm Đồng neh lơh jat niam bơta pràn, bơta ƀuơn bè lơh sa suơn sre nàng ngui geh cồng nha ală phan kwơ tàm ù lơh gơlik geh ală phan bơna pa drơng broă nhơl chờ, lơh geh tai priă lơh geh, bơsong broă lơh mờ yal tơngĭt phan bơna lơh geh bơh suơn sre bơh tiah do dê. Mơya, tàm tơngai lam lơh jat neh tơngŏ uă bơta ờ niam mờ ờ pràn kờñ pal gờñ geh tam gơl wơl bè lơyài bè sră nggal, ală broă bè broă jàu ù tiah bơt bơtàu, rơndap ù tiah ngui ù, rơndap ù tiah bơt bơtàu, khà broă lơh bơt bơtàu geh lơh rơkàng jơm glòm tàm ù tiah lơh sa suơn sre, tam gơl ù lơh sa suơn sre tus ù ờ di lơh sa suơn sre... kung gơtìp uă ngan bơta kwi kwơ, ờ hềt geh bơta dùl nùs bal, ring bal tàm broă lam lơh jat.