Mờ tơngume “Dà Làc- ƀòn dờng 4 kàl bơkào”, Festival bơkào Dà Làc dơ̆ 9 nam 2022 geh bơyai lơh tàm 2 nhai, bơh ngai 01 nhai 11 tus jơh ngai 31 nhai 12. Bal mờ ală broă lơh geh bơyai lơh uă ngan tàm ƀòn dờng Dà Làc, rlau 40 broă lơh lơh jat bal kung geh bơyai lơh tàm làm gùt ù tiah ndai tàm càr dê. Tŭ do, bàr pe broă lơh lơh jat bal neh hời rơ hời bơyai lơh tàm bàr pe kơnhoàl, ƀòn dờng tàm càr, bè: Dơ̆ lơh chờ niam ngan ào kăp bơkào, Dơ̆ ràng tơlik mờ yal tơngĭt ală phan bơna lơh geh bơh suơn sre, dơ̆ lơh chờ ơlak Vang bơkah...

Dà Làc neh rcang bơyai lơh Festival bơkào Dà Làc dơ̆ 9 nam 2022

Di dơ̆ do rơ̆p geh ală broă lơh ràng tơlik, yal tơngĭt ală phan bơna lơh geh bơh suơn sre cèng mat  kă bro “Dà Làc- bơta niam ngan rlau jơh bơh ù tiah niam dê”, bơkào là tơngume tờm ngan gam geh gơnoar atbồ tiah do, làng bol mờ mpồl cau lơh broă sa sơrbac mhar ngan rcang lài nàng drơng jơnau kờñ sền bơh cau năc dê, ngan là ală bơkào dềt geh ơn bơka tàm ală tiah mpồl bơtiàn, ală gơl gùng tờm mờ gùt dar tơnau dà Xuân Hương.