Mờ tơngume “Dà Làc- ƀòn dờng Puan kàl bơkàu”, Festival Bơkàu Dà Làc dơ̆ 9 nam 2022 geh lơh tàm 2 nhai bơh ngai 01/11 tus jơh ngai 31/12 nam do. Bal mờ ală broă lơh tờm geh lơh mìng tàm Dà Làc lơm, rlau 40 broă lơh lơh jăt bal kung geh lơh uă tàm làm gùt ală tiah ndai tàm càr dê. Tŭ do, bàr pe broă lơh lơh jăt bal neh hời rơhời geh lơh tàm bàr pe kơnhoàl, ƀòn dờng tàm càr dê, bè: Chờ bơnĕ bơnài àu kăp bơkàu, ràng tơlik mờ ơn pơdơng yal tơngĭt ală phan bơna lơh geh bơh sươn sre, dơ̆ lơh chờ ơlak Vang bơkah ngan...Jăt ồng Sử Thanh Hoài, Củ tịc Ủy ƀan Ñân zân kơnhoàl Lạc Dương, càr Lâm Đồng dê yal, kơnhoàl neh rơcăng ai ală broă lơh lơh jăt bal in nàng kờn geh lơh lơngăp lơngai mờ lơh niam. Ồng Sử Thanh Hoài, đơs: Lơh jăt jơnau sồr bơh Ủy ƀan Ñân zân càr dê bè broă ală tiah tàm càr pal tus bal lơh ală broă lơh nàng lơh jăt bal Festival Bơkàu Dà Làc, kơnhoàl Lạc Dương kung geh bàr pe broă lơh nàng lơh jăt bal. Hơ̆ là kàl chờ ñhơ̆t dum ti rơcăng mŭt lơh tàm ngai 19 nhai do, bal mờ hơ̆ là kơnhoàl Lạc Dương kung bơyai lơh pơrlòng trŭ gơm phan sa, dròng cing, pơgồp bal mờ ală mpồl lơh sa kă bro bơyai lơh dơ̆ lơh chờ tàm pơrlòng ơseh ờ geh ừn tàm xã Dà Nhim.

Bal mờ gơnoar ătbồ ƀòn lơgar, ală anih drơng broă nhơl chờ bè hìu ñô sa, hìu năc, tiah lòt còp lòt nhơl...kung neh geh rơcăng lài ală bơta pal geh nàng kờñ drơng broă niam ngan rlau jơh jơnau kờñ bơh năc lòt nhơl dê. Ồng Đinh Thiên Long, là cau tờm dùl hìu ñô sa dờng tàm tiah tờm ƀòn dờng Dà Làc, pà gĭt, nàng lơh jăt Festival Bơkàu Dà Làc dơ̆ do, bơdìh mờ tơnguh uă bơta niam drơng broă, hìu ñô sa bơh ồng dê neh sền gròi ngan tus broă rơcăng bàr pe bơta phan sa mùl gŏ is geh trŭ gơm bơh ală bơta biăp, bùm kơnuh, plai đo gơcèng bơta krơi is Dà Làc dê. Ồng Đinh Thiên Long, yal: Lài mờ dơ̆ bơyai lơh Festival den broă sơnrờp là bol añ lơh sir bơta kwơ tờm ngan bơh dùl hìu ñô sa dê bè bơta niam drơng broă, bè sàng goh niam phan sa nàng wă rò dùl mpồl năc uă lòt nhơl. Dà Làc geh phan uă ngan mờ li la ngan, ngan den tàng bè hơ̆ añ kờñ năc geh sa nàng gĭt bè bơhiàn niam chài trŭ gơm phan sa bơh làng bol ƀòn dờng bơkàu dê.

Bơdìh mờ ală broă lơh đơs crih tam ya, nhơl chờ, lơh rài bồ tơngoh, ràng tơlik mờ yal tơngĭt ală phan lơh geh bơh sươn sre geh mat kă bro “Dà Làc- lơh geh crih crài bơh ù niam dê”, bơkàu là phan tờm gam geh gơnoar ătbồ tiah do, làng bol mờ mpồl lơh sa kă bro jal mhar rơcăng nàng drơng jơnau kờñ lòt sền ngui sa bơh năc lòt nhơl dê, ngan là ală sươn bơkàu dềt geh ơn tàm ală tiah mpồl bơtiàn, ală gơl gùng tờm mờ gùt dar tơnau dà Xuân Hương. Mìng is Kông ty drơng broă tiah drà Dà Làc neh rơcăng rlau 400 rbô khàp bơkàu, biài bơkàu ală bơta nàng lơh ală ù tiah bơkàu, rơndăp lơh ală gơl gùng bơkàu tàm dơ̆ bơyai lơh Festival bơkàu do.