Mho ngai 19/7, Mpồl kwang bàng jat sền Quôk hội dê bơh Thượng tướng Trần Quang Phương, Phó Củ tịc Quôk hội lơh Kwang atbồ mpồl neh geh dơ̆ lơh broă mờ kwang đơng lam bồ càr Dăk Lăk bè cồng nha lam lơh jat ală Nghị quyết bơh Quôk hội dê, geh: Broă lơh jơnau kờñ dà lơgar bơt bơtàu ƀòn lơgar pa; Broă lơh tơrmù rƀah kơ̆ kơljap tơngai bơh nam 2021 tus nam 2025 mờ Broă lơh bơtàu tơnguh lơh sa- mpồl bơtiàn tiah làng bol jơi bơtiàn dùl êt nă cau mờ tiah kơh bơnơm tơngai bơh nam 2021 tus nam 2030.

Yal mờ mpồl kwang bàng, tơnơ̆ mờr 3 nam lam lơh 3 broă lơh jơnau kờñ dà lơgar, muh mat ƀòn lơgar tàm càr Dăk Lăk neh geh bơta am gơl niam. Rài kis làng bol tiah jơi bơtiàn dùl êt nă cau rơhời geh tơnguh niam, bơta niam chài- mpồl bơtiàn geh uă tam gơl pa, khà hìu bơnhă rƀah ngai sơlơ gơmù. Rài kis nùs nhơm bơh làng bol dê pơn jat tai geh sền gròi jơh bal bè bơta niam mờ khà. Bulah bè hơ̆, tàm tŭ lam lơh 3 broă lơh jơnau kờñ dà lơgar tàm càr Dăk Lăk kung gơtìp uă kal ke, bơta ờ niam, bàr pe broă geh jàu jat broă rơndap lơh ờ gơtùi lơh geh. Bơta niam tơrmù rƀah ờ hềt ngan ngồn kơ̆ kơljap, pơhìn gơbàn rƀah mờ rƀah wơl uă ngan.