Pơn jăt tai broă pơrjum dơ̆ 4, Quốk hội khoă 15, ngai do (07/11), Quốk hội mŭt tàm poh lơh broă dơ̆ 3. Bơta ai tơngŏ loh làng ngan tàm poh lơh broă do là Quốk hội cri bơyai bè broă sơndră mờ cau tìs mờ tìs adăt boh lam; broă lơh jăt broă cah rơña; broă sơndră mờ sa kuề sa koà nam 2022.

Dùl tơngu me kwơ màng ndai là Quốk hội cri bơyai bè Rơndăp broă cih Nghị quyết bơh Quốk hội bè broă ngui geh cồng nha tơngai bơsong lơh glài gơwèt mờ kwang bàng, kông cứk, viên cứk mờ broă lơh jăt adăt lik hờ lơgar bơdìh, mŭt tàm lơgar bơh làng bol lơgar Việt Nam dê gơrềng tus jơnau “anih deh” cih tàm pang sră lòt rê mờ lơgar ndai. Tàm poh lơh broă, Quốk hội kung cri bơyai bè: rơndăp broă cih adăt hợp ták xã (tam gơl); rơndăp broă cih adăt sơndră broă làng bol; rơndăp broă cih adăt sền gàr gơnoar kwơ cau ngui sa (tam gơl); rơndăp broă cih adăt lơh broă tàm điện tử (tam gơl), rơndăp broă cih adăt khà priă (tam gơl) mờ rơndăp broă cih adăt blơi thầu (tam gơl).