Ngai 21/12, bơh bơta đơng lam bơh Củ tịc Quôk hội ồng Vương Đình Huệ, Ủy ƀan Thường vụ Quôk hội pơrjum kờp sền wơl broă lơh rcang lài mờ tă pơgồp jơnau đơs bè tơngume, broă lơh dơ̆ pơrjum nisơna dơ̆ 2, Quôk hội khoá 15 dê. Jat hơ̆, kờp dŭ pơrjum nisơna, Quôk hội lơh broă tàm 04 ngai, sơnđờm mŭt pơrjum tàm ngai 05/01/2023.

Tàm dơ̆ pơrjum nisơna dơ̆ 2, tơngume kwơ màng là Quôk hội tă pơgồp jơnau đơs, lơh nền Rơndap ù tiah jơh ală tiah dà lơgar tơngai bơh nam 2021-2030, rơndap broă lơh tus nam 2050; sền sơ wì ring bal jơnau cih Adat Kham kòp, sơm kòp (tam gơl) mờ Tơn jơh, sền sơwì broă lơh jat Nghị quyết sồ 30 bè pơrjum dơ̆ 1, Quôk hội khoá 15 dê; sền sơwì, lơh nền broă pơn jat tai lơh jat bàr pe broă lơh geh gơrềng tus broă lơh rcang sơndră kòp Kovid-19. Mơkung sền sơ wì, lơh nền bàr pe broă bè priă jền, kes priă dà lơgar mờ broă lơh mpồl cau lơh broă.