Tàm dơ̆ tìp mat, cau tĕ khà ƀòn dờng Ngã Bảy ai lơh chờ hờp ngan tềng đap ală cồng nha mờ gùt lơgar neh gàr mờ lơh geh tàm 6 nhai do, mờ kung đơs niam cồng nha bơh pơrjum dơ̆ do dê bal mờ ală broă lơh nền dipal ngan.

Cau tĕ khà ƀòn dờng Ngã Bảy kơp kờñ Quôk hội mờ Cíñ phủ pơn jat tai sền gròi, ai tơlik ală kơrnuat, broă lơh nàng gàr kơ̆ kơljap giă phan ngui lơh broă suơn sre, lơh gơlik bơta kơ̆ kơljap anih blơi phan lơh gơs bơh suơn sre in, jòi drà kă bro dờng rlau ai ală phan lơh gơs bơh suơn sre in, pleh gơ wèt tàm 2, 3 lơgar; geh ală broă lơh gơ hòi gơ jà cau lơh broă, ai geh broă lơh cau bơsram dờng pa lik klờng in, geh broă lơh gơ hòi gơ jà cau lơh broă gah lơh sơnơm, sền sơ wì wơl jơnau cih ờ ai kwang bàng, công chức, viên chức geh atbồ ù lơh sa suơn sre… Di dơ̆ do, Phó Củ tịc Thường trựk Quôk hội ồng Trần Thanh Mẫn ala mat mpồl kwang bàng Quôk hội càr Hậu Giang jàu pà 20 nơm hìu tam klac dờng kờp priă 1 tơmàn đông ai ală hìu bơnhă rƀah tàm ƀòn dờng Ngã Bảy, càr Hậu Giang in.