Tus bal pơrjum geh Phó Thủ tướng Cíñ phủ ồng Lê Minh Khái, bal mờ ala gah, mpồl lơh broă Dà lơgar bal mờ càr Quảng Bình mờ gal cau bơcri priă, cau lơh broă bal, mpồl lơh sa kă bro tàm lơgar mờ lơgar bơdìh.

Đơs tàm pơrjum, Phó Thủ tướng ồng Lê Minh Khái hòi jà, càr Quảng Bình pal lơh mhar broă lơh pràn mờ 4 bơta tờm tơnguh bơtàu, 3 tiah tờm tiah drà, 3 tiah jăt gah lơh sa, 2 tiah tờm gơn kơnờm gơguh lơh sa mờ 3 broă lơh pràn jŏ jòng. Mờ pal tơnguh broă atbồ, jăt sền broă lơh jăt broă rơndăp ù tiah, jăt tơngai sền wơl, di tŭ yal kấp geh gơnoar in ală bơta kal ke, gơkòl tàm broă lơh jăt broă rơndăp ù tiah. Pơn jăt tai lơh gơs gơnoar atbồ niam, pràn, geh cồng nha, tài làng bol, rềp làng bol, git kwơ làng bol. Hòi jà uă ngan ală bơta pràn nàng càr Quảng Bình mờ ală càr Đah tô tàm gùl lơgar tơnguh pràn brồ guh wơl lơh sa mờ tơnguh bơtàu.