Mho ngai 28/10, tàm Hìu lơh broă Cíñ phủ, Phó Thủ tướng ồng Lê Văn Thành neh wă Mpồl kwang bàng lùp sền bơh Tổng vụ ală broă bè dà lềng mờ phan tàm dà - Ủy ƀan câu Âu (EC) tơnơ̆ tŭ mpồl lòt sền bơta geh ngan bè broă bơsong jơnau đơs lài “kơryan” tơnhàu phan tàm dà lềng ờ di mờ adat boh lam, ờ yal mờ ờ jat jơnau sồr (IUU) tàm lơgar Việt Nam.

Phó Thủ tướng ồng Lê Văn Thành đơs tàm dơ̆ wă

 Tàm dơ̆ wă, Phó Thủ tướng ồng Lê Văn Thành đơs nền, Việt Nam neh mờ gam lơh ngan uă ngan rlau jơh nàng bơsong niam ngan rlau jơh ală tơngume jơnau sồr bơh EC dê gơwèt mờ broă tơrmù mờ tơn jơh bơta tơnhàu IUU wèt tus bơtàu tơnguh gah tơnhàu phan tàm dà lềng kơ̆ kơljap jŏ jòng sùm, geh kơnòl, geh bơta gròi sền. Phó Thủ tướng sồr EC mờ ală lơgar geh jơng tàm EU pơn jat tai lơh broă bal jơh nùs mờ dong kờl măi mok, phan bơna di tŭ, kờp tus bơta krơi is bơh broă lơh ka Việt Nam dê tàm broă lam lơh jat ală jơnau sồr bơh EC mờ IUU dê. Sồr EC cih dờp ală broă lơh ngan rơcang sơndră IUU mờ ală cồng nha niam ngan mờ Việt Nam neh lơh geh mờ gờñ sang tĕ ală jơnau đơs lài kơryan tus Việt Nam.