Bulah bă ù 3 lồ tàm xã Gào, ƀòn dờng Pleiku bơh ồng Lê Sỹ Đại dê ơm kis tàm càr Hà Tĩnh gam gơ wèt rơndap ù tiah kă bro- broă drơng ala, mơya cau tờm ù neh lơh tìs mờ adat boh lam dùl mpồl broă lơh geh 4 nơm hìu ndàp, 4 nơm hìu kù 6 mum mờ mờr 10 nơm hìu kơ̆ kơljap mờ gùng bê tông tàm dơlam… Broă lam lơh sơn đờm bơh bồ nam 2020 mờ tus tŭ do, Ủy ƀan Ñân zân xã Gào neh lơh 2 kơrnuat lơh glài mờ priă geh bal mờ broă lơh bơ tơl sồr dờp wơl bơta geh ngan bè ờs ù dê. Mơya, tơnơ̆ pah dơ̆ dờp kơrnuat lơh glài, ồng Đại sơlơ lơh uă rlau tai. Pa do, ồng Dương Xuân Hồng, Phó Củ tịc Ủy ƀan Ñân zân xã Gào pà git, neh pơyua sră nggal tus Ủy ƀan Ñân zân ƀòn dờng Pleiku, sồr rồn bơklơn tă sờr: “Tàm tŭ bơsong, Ủy ƀan Ñân zân xã kung neh lơh sră lơh glài; sồr Ủy ƀan Ñân zân ƀòn dờng tơlik kơrnuat lơh glài. 2, 3 dơ̆ Ủy ƀan Ñân zân xã jà lơh broă, mơya cau tờm ù đơs là tài ờ geh mat tàm ƀòn lơgar den tàng ờ gơtùi tìp, tus tàm anih ơm kung ờ tìp wơl, tŭ tus sền kung ờ geh cau lơh broă, ờ tìp mat cau tờm hìu bơnhă sơl”.

Ndrờm bè hơ̆ sơl, tàm Mpồl 5, sơnah ƀòn Thắng Lợi, ƀòn dờng Pleiku, ồng Vũ Trung Anh mờ ală hìu bơnhă rềp bal kung lơh ală broă lơh tàm ù lơh sa suơn sre. Tus tŭ do, ală broă lơh lơh tìs ơnàng mờr 300 thơk vuông, geh uă hìu đam, pơng gàr. Pa do, jat jơnau yal bơh làng bol dê, Ủy ƀan Ñân zân ƀòn dờng Pleiku git gŏ tàm tiah ù lơh sa suơn sre kềng gah gùng Tô Vĩnh Diện, sơnah ƀòn Hoa Lư. Ồng Nguyễn Văn Tùng, Củ tịc Ủy ƀan Ñân zân sơnah ƀòn Thắng Lợi pà git, geh uă jơnau lơh gơbàn broă ờ hềt di tŭ git gŏ, tŭ git gŏ den ờ gơtùi bơsong jơh ală broă lơh tìs. Tàm hơ̆ geh jơnau tài bơh pràn jak kwang bàng kâp hơ đơm mờ ală jơnau ndai bơh bơta kờñ lơh tìs làng bol dê: “Tơngai là ờ rlau 24 jơ bơh tŭ lơh sră lơh glài pal pơyua sră nggal cih jơnau sồr. Mơya geh sră cih jơnau sồr den ală jơnau cih adat boh lam dê ờ hềt loh làng, kâp hơđang pơyua sră nggal den neh rlau tŭ tơngai geh ai. Dùl broă lơh tìs, mơya he pal lơh uă dơ̆, kal ke ngan sơnah ƀòn in, tàm tŭ broă den kung uă, kwang bàng bơsong kal ke, adat boh lam den tam gơl sùm. Nùs nhơm làng bol dê gam kơp gơn, geh 1 bơnah nùs nhơm dră wơl, khi gam jat bồ tơngoh kơlôi sơnơng bơh yau, khi sơñio broă lơh do, broă lơh ne nàng tàm pơndrờm”.

Jat jơnau yal bơh Ủy ƀan Ñân zân ƀòn dờng Pleiku dê, bơh ngai 01/01/2020 tus ngai 31/8/2022, tàm ƀòn dờng neh geh 84 broă lơh tìs hàñ cíñ bè ù tiah- bơt bơtàu gơtìp lơh glài, mờ sồr pal dờp wơl bơta geh ngan bè ờs lài hơ̆. Mơya tus tŭ do, mìng geh 42 broă lơh tìs geh bơsong jơh. Ồng Mai Văn Hoàn, kwang atbồ Phòng Tài nguyên mờ Môi trường ƀòn dờng Pleiku pà git: “Tàm do, ai tơlik bơta atbồ bơh gơnoar atbồ kâp hơ đơm dê. Ngan là ală xã, sơnah ƀòn cau git jơh, mơya 2, 3 nă cau den ờ gròi sền. Bơh sơn rờp, khi tồn lah lơh ală broă lơh bè ờs, mơya tŭ git gŏ den neh gơ gơs dờng ngan. Tŭ hơ̆, sơrlèt rlau gơnăp gơnoar, pal pơyua kâp ƀòn dờng, Ủy ƀan Ñân zân ƀòn dờng jàu kơnòl ai Củ tịc Ủy ƀan Ñân zân xã, sơnah ƀòn in den cau ờ gròi sền tus broă do”.

Tàm pơrjum dơ̆ 9, Hội đồng Ñân zân càr Gia Lai khoă 12, tơngai lơh broă bơh nam 2021 tus nam 2026 pa do, lùp bè bơta lơh tìs lơh ală broă lơh tìs mờ adat boh lam tàm ù lơh sa suơn sre, geh 2, 3 nă kwang bàng đơs: uă broă lơh dờng, geh lơh tàm tơngai jŏ jòng, mơya broă git gŏ ờ di tŭ, bơsong ờ kràñ cê. Tus tŭ broă lơh geh lơh sir, rồn bơklơn tă sờr den geh lơh gơbàn hoàc huơr tus priă jền mpồl bơtiàn. Hơ bè bơta do, ồng Lương Thanh Bình, Phó Kwang atbồ Sở Tài nguyên mờ Môi trường càr Gia Lai pà git: “Broă atbồ ù do tàm ală tiah, kơnòl tờm ngan là bơh Ủy ƀan Ñân zân ală tiah dê. Bè kơnòl bơh gah brơ lơh dê nàng bơsong ală bơta ờ niam pa yal, Sở Tài nguyên mờ Môi trường neh ai tơlik jơnau đơs Ủy ƀan Ñân zân càr in. Jat hơ̆, Ủy ƀan Ñân zân càr neh sồr ală sở, gah broă lơh geh gơ rềng mờ ală tiah sơlơ tơnguh broă lơh mblàng yal, kràñ cê lơh glài ală broă lơh tìs”.

Nàng kờñ sơlơ tơnguh broă lơh atbồ m bong broă lơh tìs tàm gah ù tiah, nggùl nam 2022, Ủy ƀan Ñân zân ƀòn dờng Pleiku neh crơng gơs mpồl lùp sền tơngume bè broă lơh bơt bơtàu, ù tiah tàm ală xã, sơnah ƀòn geh uă broă lơh tìs, lơh gơbàn ờ suk tàm mpồl bơtiàn. Kờp dŭ, tus bồ nam 2023, ƀòn dờng geh yal ngan ngồn bè cồng nha bơsong ală broă lơh bơt bơtàu tìs mờ adat boh lam mờ bơsong kơnòl đơng lam bồ ală xã ờ geh broă lam lơh nền nòn ngan ngồn, lời gơlik geh bơta do mờ gơlik geh jŏ jòng.