Pa do, tàm ƀòn dờng Dà Làc, Đoàn ơruh pơnu Kộng sản Hồ Chí Minh pơgồp bal mờ Tỉñ ủy, UɃÑZ càr Lâm Đồng bơyai lơh jào khà pơn jờng Lương Định Của dơ̆ 17 mờ jào khà pơn jờng tơn jơh Dơ̆ pơrlòng mŭt lơh broă ơruh pơnu ƀòn lơgar nam 2022. Bơh 17 nam bơyai lơh, Khà pơn jờng Lương Định Của neh pơn jờng 2 rơbô 050 “Cau lơh sa suơn sre jăk ngan”. Mờ nam do, khà pơn jờng geh jào ai 32 nă ơruh pơnu geh pơnrơ jăk mờ bồ tơngoh kờñ brồ guh lơh pas mờ geh cồng nha uă tàm gùt lơgar.

Đơs tàm dơ̆ pơrjum, ồng Trần Tuấn Anh, Kwang atbồ Ƀan Kiñ tế Dà lơgar neh tơlik nùs nhơm chờ hờp bè broă geh sơlơ ngai sơlơ uă mpồl lơh sa kă bro, Hợp ták xã, anih lơh sa dờng gam kơnòm să, ală broă lơh pơgồp bal tơnguh bơtàu lơh sa tàm broă lơh sa suơn sre, ƀòn lơgar mhar gơs broă lơh geh pơnrơ ngan tàm ală càr, tàm tiah do mờ tàm dunia dê. Tàm ală ơruh pơnu geh dờp khà pơn jờng Lương Định Của nam 2022, geh uă cau kơnòm să geh priă rơlao 30 tơmàn đong mờ geh bơyô geh 706 tơmàn đong, priă cồng geh git nđờ tơmàn đong pah nam. Tàm hơ̆ uă ngan, geh uă cau kơnòm să là ơruh pơnu kòn cau kis tàm tiah gam kal ke mơya mờ bồ tơngoh bal mờ bơta pràn neh sơrlèt nàng brồ guh lơh pas di mờ adăt boh lam, gơs cau pas tŭ gam kơnòm să. Do là ală cau tờm geh bơta niam tàm broă ơruh pơnu pơrlòng bal lơh sa, kă bro jăk, cau kơnòm să tus bal bơ̆t bơtàu ƀòn lơgar pa tàm càr. Mờ ală broă lơh, broă lơh mùl màl neh pơlam ală ơruh pơnu kis tàm ƀòn tus bal pơrlòng lơh sa sơrlèt kal ke mờ brồ guh lơh pas. Ồng Trần Tuấn Anh đơs: “He bơyai lơh pơn jờng ală cau lơh sa suơn sre jăk ngan, ală cau do là ală bơkào niam bơnĕ ngan tàm git nđờ tơlăk nă ơruh pơnu geh pơnrơ jăk gam ngai kung bè mang pơgồp bal bơta pràn kơnòm să, bơta ngăc ngar, bồ tơngoh kơ̆ dơn, bal mờ bơta tơriang tơrồng ai broă tơnguh bơtàu lơh sa suơn sre, bơ̆t bơtàu ƀòn lơgar pa. Añ pin là, mờ nùs nhơm pơn yờ să bơh tơl nă cau bơyô gam kơnòm să geh dờp khà pơn jờng ngai do, geh pơn jăt tai lơh geh uă tus gal đoàn viên, ơruh pơnu tàm tơl càr, ƀòn dờng, mpồl lơh broă, pơgồp bal kwơ màng tàm broă chồl pràn ală broă pơrlòng lơh sa kă bro jăk, bơ̆t bơtàu ƀòn lơgar pa geh uă bơta pràn kơl dang rơlao tàm tơngai tus”.

Ồng Trần Tuấn Anh kung sồr, ală kấp ủy Đảng, gơnoar atbồ, ală ƀộ, gah lơh broă dà lơgar pal sền gròi rơlao tai tus ơrh pơnu mờ broă lơh ơruh pơnu dê, kờñ bal mờ ai geh bơta niam ngan nàng cau kơnòm să gùt lơgar bal mờ mpồl Đoàn đơs bal, ơruh pơnu ƀòn lơgar đơs is, pơgồp bơta bơta pràn, bơta jăk chài, ngăc ngar, lam lài tus bal tơnguh bơtàu lơh sa mpồl bơtiàn, lơh geh cồng nha broă bơ̆t bơtàu pa dà lơgar mờ lơh sa suơn sre, ƀòn lơgar.

Tàm pơrjum, geh 32 nă ơruh pơnu geh pơnrơ jăk geh rơwah bơh 81 pang sră tus bơh 45 tỉñ, thàñ đoàn tàm gùt lơgar geh jào khà pơn jờng Lương Định Của nam 2022. Mpồl bơyai lơh neh jào khà pơn jờng ai 9 rơndăp broă lơh jăk ngan (tàm hơ̆ geh 1 khà 1, 2 khà 2, 3 khà 3 mờ 3 khà pơn jờng), tàm khà 31 rơndăp broă lơh tus bal dar pơrlòng dŭt ndơl bơh Dơ̆ pơrlòng Rơndăp broă mŭt lơh broă ơruh pơnu ƀòn lơgar nam 2022.

Kung gơrềng tus mờ broă mŭt lơh broă ai ơruh pơnu tàm ƀòn in sơl, tàm poh lài, mpồl ơruh pơnu Việt Nam càr Dăk Lăk neh bơyai lơh bơto pơlam tơnguh uă jơnau git wă, ngui khoa họk kông nghệ tàm broă lơh sa suơn sre mờ kă bro phan geh lơh ai ơruh pơnu kòn cau in. Tus bal ơdŭ bơto pơlam geh rơlao 100 nă ơruh pơnu kòn cau gam lơh sa, kă bro tàm gah lơh sa suơn sre mờ kwang bàng tàm mpồl ơruh pơnu tàm ƀòn ơm kis tàm gùt càr tus bal.

Ală cau bơsram geh bơto pơlam ală jơnau git wă bè mpồl geh kwơ, pơgồp bal mpồl, ală bơta ngăc ngar bè ngui mpồl geh kwơ tàm broă lơh sa mờ kă bro phan geh lơh, bơta ngăc ngar tàm broă yal phan geh lơh mờ tăc phan geh lơh. Lơh jăt mpồl bè mpồl geh kwơ, lơh gơs pang internet điện tử mờ tăc phan tàm internet. Bi Y Lê Pas Tơr, Củ tịc Mpồl ơruh pơnu Việt Nam càr Dăk Lăk pà git, do là broă lơh jăt broă lơh bơh Mpồl ơruh pơnu Việt Nam càr Dăk Lăk nàng dong kờl ơruh pơnu kòn cau kis tàm càr geh tai jơnau git wă, bơta ngăc ngar, broă mờng chài, gơguh jăk khoa họk kỹ thuật tàm lơh sa suơn sre, pơgồp bal tàm broă tơnguh bơtàu lơh sa mpồl bơtiàn. “Tàm bơta lơh sa suơn sre bơh ơruh pơnu tàm càr Dăk Lăk geh khà khoa họk kông nghệ kung bè ngui khoa họk kông nghệ tàm broă lơh sa kung gam uă bơta ờ pràn. Broă yal bơta ngăc ngar gơrềng tus mờ ngui ală bơta gơguh jăk khoa họk kông nghệ mờ tàm lơh sa ai ơruh pơnu in là dùl kơnòl lài ngan. Mpồl Đoàn, mpồl tus bal mờ broă lơh do bè mŭt lơh broă, tàm hơ̆ uă ngan là broă lòt bal mờ ơruh pơnu tàm broă mŭt lơh să, lơh broă, lơh sa”.