Ngai òr (10/11), Mpồl cau lơh sa kă bro kơnòm să càr Dăk Lăk bơyai lơh pơrjum tơrbŏ bal lòt rê kă bro, lơh broă bal kă bro mờ bơcri priă mờ broă tus bal bơh mờr 40 Mpồl cau lơh sa kă bro gam kơnòm să ală càr, ƀòn dờng, gah lơh broă, mpồl lơh broă bal mờ mờr 1 rơbô nă cau ala măt là cau lơh sa kă bro kơnòm să tàm gùt lơgar.

Pơrjum tơrgùm tàm ală tơngu me “Tam gơl sồ tơnguh bơta pràn phan geh lơh bơh broă lơh sa suơn sre Việt Nam dê”; càr Dăk Lăk-anih tus bơh ală cau bơcri priă lơh sa suơn sre pa; ai phan geh lơh bơh broă lơh sa suơn sre tus tàm ală pang kă bro điện tử mờ bơta niam tăc phan mờ lơgar bơdìh bơh càr Dăk Lăk tus tàm dunia dê. Pơrjum kung yal ală khà măt rơndăp broă hòi jà bơcri priă tàm càr Dăk Lăk, cri bơyai, tam pà bal bơta niam bơcri priă mờ bơta pràn tơnguh bơtàu bơh càr Dăk Lăk dê. Tàm pơrjum geh 22 mpồl kĭ hơ bal ală sră nggal kah bal “Tơrbŏ bal lòt rê kă bro, lơh broă bal kă bro mờ bơcri priă”. Di tàm dơ̆ do, Mpồl cau lơh sa kă bro kơnòm să Việt Nam pà 2 nơm hìu geh 110 tơlăk đong ai ală hìu geh rài kis kal ke tàm kơnhoàl Cư̆ Kuiñ, càr Dăk Lăk in; pà 50 bơnah phan ai cau gơtìp sơnơm khih tàm rài tam lơh tàm càr mờ khà 100 tơlăk đong.