Tơngu me bơh dơ̆ pơrjum do kờñ sền wơl broă lơh bal đah bàr lơgar tàm ală gah broă bơh pơrjum dơ̆ 18 tus tŭ do, mờ ai tơlik gùng dà broă lơh bal tàm tơngai tus.

                                    Pơrjum Ủy ƀan bàr Cíñ phủ lơgar Việt Nam mờ lơgar Hàn Quốk dơ̆ 19

Bàr gah neh cri bơyai bè broă lơh bal mờ ală broă chồl pràn lơh broă bal tàm ală gah broă: kă bro, bơcri priă, broă tơnguh bơtàu bal, lơh broă mpồl bơtiàn, năng lượng, bơ̆t bơtàu phan bơna, priă jền-ngân hàng... mờ ờ uă broă lơh ndai tai. Broă lơh git gơ̆p, lơh broă bal đah lơgar Việt Nam mờ lơgar Hàn Quốk pơn jăt tai geh ală broă tơnguh bơtàu pràn kơl dang tàm nam do jơh ală gah broă, cèng geh bơta kwơ mờ git wă bal, pin dờn bal uă ngan ai jơh bàr gah in. Nam do ai tơngŏ 30 nam crơng gơs broă lơh bal mờ lơgar ndai mờ broă tơnguh bơtàu bal đah lơgar Việt Nam mờ lơgar Hàn Quốk, neh geh uă cồng nha dờng màng. Kờp tus nhai 9 nam do, lơgar Hàn Quốk neh geh di pơgăp 9 rơbô 438 rơndăp broă geh lơh, mờ kờp jơh khà priă bơcri dan cih măt geh di pơgăp 80 tơmàn 500 tơlăk dolar Mỹ, là lơgar lơh broă bal lài ngan lơgar Việt Nam dê bè bơcri priă tơn bơh lơgar bơdìh.