Dơ̆ cribơyai geh pờ tơlik jơnau đơs, sơñio rùp tơn nàng cau tĕ khà mờ làng bol gùt lơgar in iat mờ sền. Jơnau yal cồng nha lơh sa- mpồl bơtiàn ai gŏ, kờp dŭ gùt nam geh 14 tàm 15 broă geh jàu gơtùi lơh geh mờ sơrlèt rlau mờ broă rơndap lơh Quôk hội jàu. Do là bơta lơh ngan bơh jơh gùt anih lơh broă cíñ trị mờ jơh gùt mpồl bơtiàn dê, bơta pràn niam ngan ai jơnau kờñ broă rơndap lơh 5 nam in. Bulah bè hơ̆, mìng jơnau kờñ tơnguh cồng nha lơh broă mpồl bơtiàn lơh ờ gơtùi.

Pơrjum dơ̆ 4, Quôk hội khoă 15

Broă geh jàu bè tơnguh cồng nha lơh sa mpồl bơtiàn kờp dŭ gơguh bơh 4,7 tus 5,2%, là lơyah rlau mờ jơnau kờñ ai tơlik bơh 0,3 tus 0,5%. Do là broă geh jàu kuơmàng ngan ai gŏ bơta pràn tàm pơrlòng bơh rài lơh sa dê. Tàm tŭ gơguh lơh sa kờp dŭ sơrlèt rlau mờr 2% pơndrờm mờ broă rơndap lơh mờ GDP kờp bal tàm dùl nă cau kung kờp dŭ sơrlèt rlau mờ broă rơndap lơh. Tàm dơ̆ cribơyai bè broă lơh sa- mpồl bơtiàn mờ kes priă, ală kwang bàng mờ cau tĕ khà kơp kơnờm, Quôk hội geh ai tơlik ală broă lơh geh cồng nha, lơh gơlik bơta pràn chul chồl ai dà lơgar bơtàu tơnguh wơl pràn kơldang tơnơ̆ kòp Kovid-19.