Pơn jat tai Broă lơh pơrjum dơ̆ 4, Quôk hội khoá 15, drim ngai 07/11, ală kwang bàng cribơyai tàm hìu pơrjum gơwèt 02 jơnau rcang cih Nghị quyết bè: “Lơh tơrlòng lài bàr pe gùng dà, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk” mờ “Lơh tơrlòng lài ai gơnoar sac rơwah ngui ƀàng sồ rơndeh ôtô bơh broă pơrlòng giă priă”; iăt kơno jơnau sền mờ jơnau yal sền sơ wì rơndap broă lơh Adat pơrlòng giă priă (tam gơl).

Cribơyai bè jơnau rcang cih Nghị quyết bè lơh tơrlòng lài bàr pe gùng dà, broă lơh krơi is bơtàu tơnguh ƀòn dờng Buôn Ma Thuột, càr Dăk Lăk, ală kwang bàng Quôk hội ndrờm đơs nền do là broă lơh pal geh nàng bơt bơtàu, bơtàu tơnguh ƀòn dờng Buôn Ma Thuột gơ gơs là anih tờm, tiah gơguh lơh sa bơh tiah Tây Nguyên dê, den tàng bè hơ̆ ală broă lơh krơi is kờñ pal lơh pràn kơl dang mờ pal geh rơndap broă lơh. Tơngai tus, Cíñ phủ bơt bơtàu broă lơh krơi is ai jơh tiah Tây Nguyên in jat Nghị quyết sồ 23 bơh Ƀộ Cíñ trị dê bè gùng dà broă lơh bơtàu tơnguh lơh sa- mpồl bơtiàn mờ gàr niam sền gàr dà lơgar, sền gàr lơngap lơngai tiah Tây Nguyên tus nam 2030, rơndap broă lơh tus nam 2045, Cíñ phủ geh gròi sền, jat sền nàng ală broă lơh do gơ mŭt tàm rài kis, sền wơl jơnau đơs nàng bơtơl tai ai gơ in di pal.