Jơh bơsram đại họk gah Adăt boh lam lơh sa nam 2021, mờ uă broă lơh pràn niam, nhai 07 nam 2021 bi A Nguyên, kòn cau Bơnhàr, kis tàm ƀòn Kon Gung geh pin dờn pồ bơtơl lơh Phó Ƀí thư Đoàn xã Đăk Mar, kơnhoàl Đăk Hà. Să tờm là cau jăt yàng Bàp, lơh jăt nùs nhơm tơriang bal mờ bơta pràn kơl dang bơh cau kơnòm să dê, nhai 10 nam 2022 tàm Thôn Đăk Mút, bi A Nguyên lơh gơs Mpồl Ơruh pơnu jăt yàng bơtàu tơnguh lơh sa, tơrgùm geh 15 nă cau tus bal. Bơh broă tơrlòng ròng phan, lơh niam wơl suơn tam phan, sền gàr sơnka suơn kơphe, tam tờm chi sa plai jăt broă lơh ờ ngui phơng, Mpồl do neh lơh geh uă priă ai ală cau tàm mpồl in kung bè lơh geh bơta gơrờm bal niam tus mờ mpồl bơtiàn.

Ồng Lê Xuân Hưng, Ƀí thư Đảng ủy xã Đăk Mar pà git, Đảng ủy xã đơs niam cồng nha broă lơh bơh mpồl do dê. Ồng Lê Xuân Hưng pà git: “Bơh broă sền añ gŏ Mpồl lơh broă do geh cồng nha ngan. Tŭ do, ală cau tàm mpồl bơto sồr bal bè broă sền gàr sơnka phan tam, phan ròng kung bè jơnau git wă bè bơtàu tơnguh lơh sa. Broă lơh do neh geh Đảng ủy sồr lơh geh uă tus 2 thôn tàm xã. Huyện đoan kơnhoàl Đăk Hà neh lơh geh uă broă lơh Ơruh pơnu jăt yàng Bàp bơtàu tơnguh lơh sa tus gùt kơnhoàl”.

Geh Đảng ủy xã Đăk Mar, kơnhoàl Đăk Hà gŏ, bơto bơtơl, să tờm bi A Nguyên lơh ngan pơlam nùs nhơm, bơsram tàp. Nhai 07 nam 2023, bi A Nguyên geh ală hìu làng bol tàm thôn Đăk Mút pin dờn pồ lơh kwang atbồ thôn. Kung tàm tơngai do bi A Nguyên pơnyờ să geh mùl màl mŭt tàm mpồl Đảng. Bi A Nguyên yal: “Să tờm añ sùm còp să ală hìu nhă gơtìp kal ke bè lơh sa do, kal ke bè nùs nhơm nàng mblàng yal tus mờ làng bol pal tam gơl bồ tơngoh kơlôi sơnơng, broă lơh bơh să tờm dê. Pal lơh niam suơn tam phan bañ lời ù sơbì gời. Tus tŭ do tàm Đăk Mút ờ gam geh hìu lơi lời bă ù sơbì gời. tŭ do hìu lơi kung tam kơphe, hơ̆ sồng sầu riêng, pơnăt”.

Ală kấp ủy đảng, gơnoar atbồ bơh càr tus ală xã tàm càr Kon Tum sùm sền gròi bơ̆t bơtàu mpồl kwang bàng làng bol jơi bơtiàn ờ gal cau, tàm hơ̆ uă ngan là tàm kấp xã. Tŭ do, tàm rơlao 2 rơbô nă kwang bàng, kông cứk lơh broă tàm 102 xã, sơnah ƀòn, ƀòn drà dềt tàm càr dê geh mờr 1 rơbô 400 nă kwang bàng kông cứk là jơi bơtiàn ờ gal cau geh mờr 68%.

Geh pơnrơ ngan bè xã Măng Bút, kơnhoàl Kon Plông, tàm khà 22 nă kwang bàng kông cứk xã lơh broă geh tus 17 nă kwang bàng kông cứk kòn cau Sơdàng. Bi A Dân, Phó Củ tịc Anih duh broă Làng bol xã Măng Bút, dờng pràn bơh Rơndăp broă tơrlòng rơwah 600 nă cau ngăc ngar gam kơnòm să neh jơh bơsram đại họk tus lơh Phó Củ tịc Anih duh broă Làng bol xã gơwèt 63 kơnhoàl rơƀah tàm gùt lơgar, ai tơngŏ broă bơsram tàp, lơh ngan, bi sùm dờp geh jơnau sền gròi, dong kờl bơh kấp ủy đảng mờ gơnoar atbồ xã dê. Bơta do dong kờl bi geh tai bơta pràn nàng lơh ngan bơtơl, bơsram tàp mờ lơh broă uă rơlao tai ai ƀòn lơgar in. Bi A Dân pà git: “Añ tus bal Rơndăp broă lơh 600 PHó Củ tịc xã, geh Đảng, Dà lơgar sền gròi bơ̆t bơtàu là mpồl kwang bàng kơnòm să, kwang bàng jơi bơtiàn ờ gal cau pơn jăt tai rơcang lài, añ sùm pin dờn lơh ngan mờ geh pồ lơh Phó Củ tịc xã tơngai bơh broă dơ̆ bàr. Añ neh bơsram bơh ơdŭ bơto Trung kấp cri bơyai jơnau tàm sră pơ-àr cíñ trị, ơdŭ cau lơh broă tờm. Tŭ do geh kấp ủy đảng mờ gơnoar atbồ xã sền gròi añ gam rơcang lòt bơsram ơdŭ Kao kấp cri bơyai jơnau sră pơ-àr cíñ trị”.

Tơnơ̆ 33 nam crơng gơs wơl càr, Kon Tum neh bơ̆t bơtàu geh mpồl kwang bàng, kông cứk, viên cứk rơlao 18 rơbô nă, tàm hơ̆ kwang bàng jơi bơtiàn ờ gal cau rơlao 4 rơbô 100 nă, geh rơlao 22%. Gơwèt mờ kấp càr, Kon Tum geh 82 nă kwang bàng jơi bơtiàn ờ gal cau at gơnoar broă bơh Phó kwang atbồ Cơl dŭ lơh broă mờ ndrờm bal rơlao hờ đang; kấp kơnhoàl geh 225 nă kwang bàng jơi bơtiàn ờ gal cau at gơnoar broă bơh Phó kwang atbồ Cơl dŭ lơh broă mờ ndrờm bal rơlao hờ đang; kấp xã geh 397 nă kwang bàng jơi bơtiàn ờ gal cau at gơnoar broă Ƀí thư, Phó Ƀí thư; Củ tịc, Phó Củ tịc Mpồl duh broă Làng bol, Anih duh broă Làng bol mờ kấp atbồ, kấp phó mpồl lơh broă cíñ trị mpồl bơtiàn. Ồng Lê Viết Nam, Phó Kwang atbồ Sở Nội vụ càr Kon Tum pà git, broă rơcăng lài cau, rơndăp pồ bơtơl kwang bàng jơi bơtiàn ờ gal cau sùm geh Tỉñ ủy mờ Anih duh broă Làng bol càr sền gròi ngan. Ồng Lê Viết Nam pà git: “Càr neh ai Ală jơnau neh geh lơh nền bè bơ̆t bơtàu mpồl kwang bàng jơi bơtiàn ờ gal cau. Hơ̆ sồng kấp ủy đảng geh sră nggal sồr lơh nàng tàm broă lơh rơndăp kwang bàng, pồ bơtơl sền gròi tus mpồl kwang bàng kông cứk là cau jơi bơtiàn ờ gal cau. Tŭ do, rơcang tus pơrjum dờng tơngai lơh broă, geh uă kwang bàng jơi bơtiàn ờ gal cau tàm ală anih lơh broă, mpồl lơh broă ndrờm neh geh rơndăp mờ rơndăp ală gơnoar broă đơng lam bồ tờm bơh ală kấp dê, tàm hơ̆ uă ngan là ală sở, gah lơh broă tàm càr, ală kơnhoàl, ƀòn dờng ndrờm geh khà kwang bàng jơi bơtiàn ờ gal cau geh rơndăp tơmŭt tàm ală gơnoar broă do”.