Bơh bồ nam bơsram 2022- 2023 tus tŭ do, tàm càr Lâm Đồng gơlik geh 5 dơ̆ tam lơh tàm hìu bơsram bơh kâp 1 tus kâp 3 lơh gơbàn ờ suk ngan tàm mpồl bơtiàn. Tàm hơ̆, uă ngan ală broă gơlik geh là bơta 1 mpồl lơh 1 nă lơh gơbàn sồt să, lơh cau gơtìp lơh pal mut tàm hìu sơnơm. Tàm hơ̆ geh broă 2 nă kơnòm bơsram ùr bơh dùl hìu bơsram kâp 1 tàm sơnah ƀòn 2, ƀòn dờng Dà Làc gơtìp dùl nă cau klau bơh bơdìh hoài mut tàm hìu jă brê bơh hìu bơsram dê tơ ƀư mờ kơl tơ̆ bic bài. Kơn jơ̆ ngan rlau jơh là broă gơlik geh tàm klò ngai, ngai 21/10, dùl nă kơnòm bơsram klau ơdŭ 9 bơh hìu bơsram kâp 2 Nam Ban, kơnhoàl Lâm Hà gơtìp srơp chơt tŭ pa lik klờng mờ gam tàm gùng rê tàm hìu.

Jat ồng Huỳnh Quang Long, Phó Kwang atbồ Sở Giáo zụk mờ Đào tạo càr Lâm Đồng đơs, bơta tam lơh tam pờng tàm hìu bơsram tàm càr gam ngai sơlơ gơlik geh kal ke, 2, 3 broă lơh gơbàn jơnau gơ lời wơl kơn jơ̆ ngan, gơ rềng tus nùs nhơm, pràn kơldang să jan bơh kơnòm bơsram dê, lơh gơbàn bơta ờ suk tàm mpồl bơtiàn mờ lơh gơlik uă broă kơlôi rơcang tàm mpồl bơtiàn: “Nùs nhơm tàm hìu bơsram kơn jơ̆ kơn jut ngan, bơh cau pơgru tus kơnòm bơsram, lòt tềng lơi bol hi kung gŏ bơta cau đơs lơm. Hơ̆ sồng ală oh tơrgùm bồ tàm boh bơr mờ gơp, lơh nùs nhơm tàm hìu bơsram gơ lơh kal ke ngan. Bơdìh hơ̆ tai, do kung là bơta ờ suk bơh mè bèp kơnòm bơsram dê, lơh bơta niam bơnĕ bơh hìu bơsram dê gơ roh bơta kuơ gơ dê. Mờ jơh gùt mpồl bơtiàn kung sền gròi ngan tus broă do mờ gơ kung lơh gơ rềng uă tus broă bơto bơtê nùs nhơm mpồl bơtiàn dê gơ wèt mờ kơnòm bơsram. Ai tơnggŏ bơta ờ niam nùs nhơm pal kơlôi rơcang ngan”.

Tềng đap bơta tam lơh tàm pờng tàm hìu bơsram gơguh uă, Ủy ƀan Ñân zân càr Lâm Đồng neh ai tơlik sră nggal sồr kwang atbồ Sở Giáo zụk mờ Đào tạo đơng lam, pơgồp bal mờ Kwang atbồ Sở Lao động, Thương ƀiñ mờ Xã hội, kwang atbồ Kwang àng càr mờ Củ tịc Ủy ƀan Ñân zân ală kơnhoàl, ƀòn dờng, kwang atbồ ală sở, mpồl, gah broă lơh, mpồl cau, anih lơh broă, mpồl lơh broă geh gơ rềng tàm càr sơlơ tơnguh ală broă lơh nàng bơsong. Tàm hơ̆, sền gròi tus bơta tơnguh jơnau git wă, kơnòl bơh kwang bàng atbồ, cau pơgru, cau lơh broă hìu bơsram, kơnòm bơsram mờ hìu bơnhă kơnòm bơsram dê bè rơcang sơndră tam lơh tam pờng tàm hìu bơsram; rơcang lài lam lơh ală broă lơh sền gàr lơngăp lơngai, ờdo ờdă tàm mpồng hìu bơsram mờ ală tiah gùt dar, di tŭ kơryan ală cau bơh bơdìh mut tàm hìu bơsram nàng lơh aniai, tam lơh, pơhìn nùs nhơm ală kơnòm bơsram, cau bơsram dờng.

Tàm nhai 9 mờ nhai 10 pa do, tàm càr Dăk Lăk neh gơlik geh uă broă tam lơh tam pờng tàm hìu bơsram. Tàm hơ̆, geh 2 broă kơn jơ̆ ngan gơlik geh tàm hìu bơsram kâp 3 Krông Ana mờ tàm hìu bơsram kâp 2 Nguyễn Du, thị xã Buôn Hồ. Ồng Phạm Đăng Khoa, Kwang atbồ Sở Giáo zụk mờ Đào tạo càr Dăk Lăk pà git, ală dơ̆ tam lơh đah kơnòm bơsram sùm gơlik geh bơdìh hìu bơsram, tơnơ̆ jơ bơsram. Jơnau là tài bơh ờ geh bơta sền gròi bơh hìu bơnhă dê, gơtìp gơ rềng bơh ală jơnau tơnggit mờ broă ờ niam ờ gơtùi gròi sền tàm mạng xã hội. nàng bơsong, Sở giáo zụk mờ Đào tạo càr Dăk Lăk sồr ală hìu bơsram sơlơ tơnguh broă atbồ kơnòm bơsram, lam lơh mblàng yal, bơto bơtê adat boh lam, ală dơ̆ pơrjum tơngume nàng kờñ tơnguh jơnau git wă bơh kơnòm bơsram dê tàm broă “đơs ờ mờ bơta loh pờng mờ broă ờ niam tàm mpồl bơtiàn”. Ồng Phạm Đăng Khoa đơs: “Bol hi neh jàu kơnòm ai hìu bơsram, ai pơgru atbồ ơdŭ in, ai ală mpồl lơh broă đoàn, đội tàm hìu bơsram in sùm sền gròi tus ală cau gơtìp kal ke bè rài kis lơh sa halà kal ke bè hìu bơnhă nàng dong ală oh kơryan bơta tam lơh tam pờng tàm hìu bơsram”.

Bơta tam lơh tam pờng tàm hìu boảm tŭ do pal kơlôi rơcang ngan tŭ ală broă kơnòm bơsram tam lơh ngai sơlơ kal ke, lơh gơ rềng tus pràn kơldang să jan, nùs nhơm bơh kơnòm bơsram dê. Kềng bơdìh hìu pơrjum Quôk hội, 2, 3 nă kwang bàng đơs là, hìu bơnhă, hìu bơsram mờ jơh gùt mpồl bơtiàn pal at tê bal nàng bơto bơtê ală oh dùl bă di pal ngan rlau jơh. Tàm pơrjum dơ̆ 4, Quôk hội khoă 15, uă kwang bàng neh đơs bè bơta geh ngan do. Jat mò Đặng Bích Ngọc, mpồl kwang bàng Quôk hội càr Hòa Bình đơs: Kơnòm bơsram tŭ do gơtìp gơ rềng bồ tơngoh bơh uă bơta, tàm hơ̆ geh gơ rềng bơta kơn jơ̆ tàm broă bơsram sră, bơh rài kis să tờm kơnòm bơsram dê mờ gơ rềng bơh mạng xã hội. Bè hơ̆ den tàng kờñ ngan geh bơta pơgồp bal jơh nùs đah hìu bơsram mờ hìu bơnhă tàm broă bơto bơtê nùs nhơm: “Pal geh bơta pơgồp bal jơh nùs đah hìu bơnhă mờ hìu bơsram, kung pal geh ală dơ̆ pơrjum, cribơyai nàng tam pà ală broă bè mpồl bơtiàn, ală broă bè nùs nhơm, bè bơto bơtê nùs tồr kòn bơnus, nàng lơh bè lơi ală sau kung git loh. Hìu bơnhă kung ờ gơtùi jàu jơh ai ală pơgru tàm hìu bơsram in, mờ pal sùm geh bơta tàm cribơyai, tam pà bal. Ală mè bèp kơnòm bơsram kung pal geh bơta tàm pơgồp bal, rềp mềr mờ hìu bơsram rlau tai, mờ ală pơgru kòn he dê rlau tai”.

2, 3 nă kwang bàng Quôk hội kung đơs là, hìu bơsram pal sền gròi tus broă bơto bơtê 2, 3 bơta môn bơsram bè bơta chài tàm rài kis, bơto bơtê làng bol, bơto jơnau git wă dipal ai kơnòm bơsram in bè broă lơh niam, sơlơ tơnguh nùs nhơm geh kơnòl kung bè bơta git wă dră wơl, kơryan bơta tam lơh tam pờng tàm hìu bơsram.