Tàm drim ngai 08/11 tơn, tàm Kung Ring lơngai tàm càr lơgar Phnom Penh, lơgar Campuhia dê, Thủ tướng Cíñ phủ Campuchia ồng Samdech Techo Hun Sen đơng lam dơ̆ bơyai lơh wă rò ngan ngồn Thủ tướng Cíñ phủ Việt Nam ồng Phạm Minh Chính mờ Mpồl kwang bàng kâp dờng ala măt lơgar Việt Nam lòt còp ngan ngồn lơgar Campuchia.

Tơnơ̆ dơ̆ bơyai lơh wă rò, bàr nă Thủ tướng neh tìp măt cribơyai broă ngan ngồn. Lài hơ̆, tơnơ̆ tŭ pa cơnđoà jơng tus tàm lơgar Campuchia, Thủ tướng Cíñ phủ ồng Phạm Minh Chính neh tus ơn goàng bơkàu tàm Anih Kah kir Lơngăp lơngai is, Rùp mòn ƀồc Bơtau Norodom Sihanouk, Anih Kah kir gĭt gơ̆p lơh bơyô bal Việt Nam mờ Campuchia tàm càr lơgar Phnom Penh. Tàm broă lơh lòt còp ngan ngồn lơgar Campuchia, tơnơ̆ tŭ Thủ tướng Cíñ phủ Việt Nam ồng Phạm Minh Chính tìp măt cribơyai broă mờ Thủ tướng Campuchia; Thủ tướng Phạm Minh Chính tus còp să Bơtau lơgar Campuchia ồng Norodom Sihamoni; tìp măt cribơyai broă mờ Củ tịc Thượng viện lơgar Campuchia ồng Say Chhum; tìp măt cribơyai broă mờ Củ tịc Quôk hội Campuchia ồng Heng Samrin. Dơ̆ lòt còp tàm “Nam Gĭt gơ̆p lơh bơyô bal Việt Nam mờ Campuchia 2022” pơgồp bơnah bơtàu tơnguh bơta gĭt gơ̆p lơgar rềp bal niam bơnĕ, lơh bơyô bal bơh yau, lơh broă bal tơl làm, kơ̆ kơl jăp jŏ jòng đah 2 lơgar.