Drim ngai 08/11, rơnden par pơn diang Thủ tướng Cíñ phủ ồng Phạm Minh Chính lam bồ mpồl kwang bàng kấp dờng Việt Nam neh lòt gùng tus bal Pơrjum dờng kwang bàng kấp dờng Asean dơ̆ 40, 41, ală pơrjum kwang bàng kấp dờng geh gơrềng mờ còp ngan ngồn lơgar Campuchia jat jơnau jà bơh Thủ tướng lơgar Campuchia ồng Samdech Techo Hun Sen. Do là dơ̆ lòt còp ngan ngồn lơgar Campuchia sơn rờp bơh Thủ tướng Cíñ phủ ồng Phạm Minh Chính dê tàm gơnoar broă Thủ tướng, kung là dơ̆ lòt còp sơn rờp bơh Kwang đơng lam bồ tờm ngan lơgar Việt Nam dê tus còp lơgar Campuchia tàm Năm gĭt gơ̆p lơh bơyô Việt Nam mờ Campuchia nam 2022.

Tàm ală dơ̆ pơrjum kwang bàng kấp dờng Asean, Thủ tướng Cíñ phủ ồng Phạm Minh Chính geh ală jơnau đơs kwơ màng, tam pà bal broă lơh, nùs nhơm kung bè ală jơnau sồr bơh Việt Nam dê lơh kơ̆ kơljap bơta tam klăc bal, ring bal mờ gơnoar broă tờm bơh Asean dê, lơh pràn tàm tơrbŏ bal tàm tiah do, sơlơ tơnguh lơh broă bal tàm ală gah sền gròi bal, sơlơ tơnguh gĭt gơ̆p đah Asean mờ ală lơgar lơh broă bal, mờ cribơyai bè ală broă tàm dunia mờ tàm tiah do bal mờ gùng dà broă lơh tàm pơn ring bal mờ ndrờm bal.