Jat jơnau yal, tàm 6 nhai bồ nam, broă lơh tam gơl wơl sră nggal pơn jat tai geh ală tam gơl pa. Tàm hơ̆ tơrgùm bơsong ală bơta kal ke, kòl yan geh gơrềng tus lơh tam gơl wơl sră nggal, ngan là broă lơh sră nggal. Ală Ƀộ, ngàñ, ală tiah kung neh pơnđơl pràn lơh ngan lơh jat kơnòl broă geh jàu.

Jat tơrgùm kờp, sền gĭt, broă rơndap lơh lơh tam gơl wơl sră nggal bơh ală Ƀộ, anih lơh broă ndrờm mờ Ƀộ neh ai tơlik 845 kơnòl broă, Ủy ƀan Ñân zân ală càr, ƀòn dờng neh ai tơlik 3 rơbô 003 kơnòl broă. Ală Ƀộ, gah lơh broă dà lơgar neh lơh sir 296 kơnòl broă; Ủy ƀan Ñân zân ală càr, ƀòn dờng neh lơh sir 1 rơbô 384 kơnòl broă. Thủ tướng sồr, ală kwang bàng tàm Mpồl đơng lam dê tơrgùm sền sơ wì, lơh loh ală cồng nha neh lơh geh, ală bơta ờ hềt di pal, ờ hềt niam tàm broă lơh tam gơl wơl sră nggal đơs bal, tàm hơ̆ tơrgùm lơh loh mờ ai tơlik broă lơh bơsong wơl, lơh niam ală bơta gam gơ kòl tàm broă lam lơh jat.