Anih ơhò ơm ing jun ntrờn pơndiang phan dunia Cần Giờ kờp dŭ lơh tàm bồt dà dờng Phú Lợi tàm dà dờng Cái Mép – Thị Vải, kơnhoàl Cần Giờ, kờp jơh ơnàng anih ơhò ơm mờr 571 lồ mờ mat dà ơnàng mờr 477 lồ; Kờp jơh priă tă lơh ai rơndap broă lơh in pơgap rlau 5 tơmàn dolar Mỹ. Tiah drà lòt nhơl gơ mut rlau tàm dà lềng Cần Giờ ơnàng 2 rbô 870 lồ, kờp jơh priă tă lơh rlau 217 rbô tơmàn đông. Tơnơ̆ tŭ lòt sền, Thủ tướng Cíñ phủ ồng Phạm Minh Chính geh dơ̆ lơh broă mờ kwang đơng lam bồ ală Ƀộ, Gah broă lơh dà lơgar mờ ƀòn dờng Hồ Chí Minh nàng kờñ ai tơlik lài gùng dà bơtàu tơnguh tiah Cần Giờ mhar mờ kơ̆ kơljap.

Thủ tướng Cíñ phủ ồng Phạm Minh Chính sồr ƀòn dờng Hồ Chí Minh mhar lơh rơndap ù tiah bơtàu tơnguh ƀòn dờng; bơ tơl, lơh sir rơndap ù tiah bơtàu tơnguh kơnhoàl Cần Giờ, ơn tàm rơndap ù tiah bal ƀòn dờng dê. Tàm hơ̆, geh tiah drà gơ mut rlau tàm dà lềng Cần Giờ mờ ală rơndap broă lơh ndai. Thủ tướng sồr rơndap ù tiah bơtàu tơnguh kơnhoàl Cần Giờ đơs bal mờ Tiah drà gơ mut rlau tàm dà lềng Cần Giờ đơs is pal ai ù, bơsong mờ dong kờl, tơrmù bơta kơn jơ̆ kòl gùng lòt, tiah ơm kis mờ hìu ơm ai làng bol tàm tiah tờm ƀòn dờng Hồ Chí Minh in.