Tiah sơn rờp Thủ tướng mờ mpồl lơh broă tus sền Gơl gùng rơndeh ntoăt răt tiah đah mat tơngai lik tàm Rơndap broă lơh Rơbàng Mỹ Thuận 2. Rơndap broă lơh Rbàng Mỹ Thuận 2 kờp jơh bơta jòng pơgap 6,61 kơi sồ lòt gan ù tiah 2 càr Tiền Giang mờ Vĩnh Long, tàm tơrbŏ mờ 2 gơl gùng rơndeh ntoăt răt Trung Lương– Mỹ Thuận mờ Mỹ Thuận– Cần Thơ gơ wèt rơndap broă lơh gùng rơndeh ntoăt răt tiah đah mat tơngai lik tơngai bơh nam 2017- 2020.

Tus tŭ do, broă lơh ai ù lơh rbàng Mỹ Thuận 2 neh sir; broă lơh lam lơh tus tŭ do neh geh rlau 70% priă bơh ală sră pơrgon dê, di tŭ tơngai sồr. Bơnah gùng mờ rbàng sền bal là neh lơh sir, bơnah rƀàng tờm tŭ do neh lơh sir jrong sơn tơ̆p, neh dăng che kăp văng ai lơh dơm bơh chờm, lơh sir rơndap broă lơh tàm nam 2023. Thủ tướng sồr mpồl lơh broă mut lơh broă ngui bơta chài kông nghệ mờ jơh ală broă lơh kỹ thuật uă ngan rlau jơh nàng lơh mhar tŭ tơngai mut lơh, mơya pal gàr geh bơta niam, lơngap lơngai, niam, mơkung sơndră sa kuề sa kuà mờ bơta ờ niam, pơ hì pơhà.