Mho ngai 13/11, tơnơ̆ dơ̆ wă ngan ngồn, Thủ tướng Cíñ phủ ồng Phạm Minh Chính neh tìp mat cribơyai mờ Thủ tướng lơgar Đức ồng Olaf Scholz. Tàm dơ̆ tìp mat, Thủ tướng Cíñ phủ ồng Phạm Minh Chính jờng rơ dơ̆ lòt còp bơh Thủ tướng lơgar Đức ồng Olaf Scholz dê geh gơtha kwơ màng ngan, ai bơta gĭt gơ̆p bàr lơgar tus tŭ tơngai bơtàu tơnguh pa.

Tàm nùs nhơm pin dờn mờ song dơ pă, bàr nă Thủ tướng neh cribơyai tơl làm bè ală bơta bơtàu tơnguh lơh sa- mpồl bơtiàn tơl lơgar dê, bơta gĭt gơ̆p lơh broă bal đah bàr gah mờ ală broă tàm tiah do mờ tàm dunia sền gròi bal. Bàr nă Thủ tướng neh ring bal ală gùng dà broă lơh, broă lơh dờng nàng lơh pràn tơl làm lơh broă bal đah bàr lơgar. Bàr gah neh ring bal sơlơ tơnguh cribơyai mpồl kwang bàng ală kấp, ngan là kwang bàng kấp dờng, tàm jơh ală gah Đảng, Dà lơgar, Cíñ phủ, Quôk hội, pơn jat tai lam lơh geh cồng nah ală gùng dà lơh broă bal đah bàr gah. Bè lơh sa- kă bro, bàr nă kwang đơng lam bồ pơn jờng ală anih lơh broă, mpồl lơh sa kă bro bàr lơgar pơn jat tai lam lơh tơl làm, geh cồng nha Hiệp địñ Kă bro khat gơboh Việt Nam mờ EU (EVFTA).