Tàm dơ̆ tìp mat, 2 nă Thủ tướng chờ hờp tềng đap ală bơta bơtàu tơnguh niam bơnĕ bơh lơh broă bal đah 2 gah dê tàm ală nam pa do, ngan là tàm gah cíñ trị- lơh broă cribơyai mờ lơgar ndai, sền gàr lơngap lơngai- sền gàr dà lơgar; kă bro mờ bơcri priă, đơs nền pơn jat tai sền dờng màng mờ lời ai lài uă ngan rlau jơh gơwèt mờ broă sền gàr, bơt bơtàu mờ bơtàu tơnguh bơta gĭt gơ̆p lơh bơyô bal dờng màng, tam klăc bal kwơ màng mờ lơh broă bal tơl làm Việt Nam mờ Lào ngai sơlơ jrô ơnàng rlau tai, geh cồng nha, cèng bơta kwơ bal geh ngan ai làng bol 2 lơgar in.

Cribơyai bè bàr pe broă dunia mờ tàm tiah do sền gròi bal, 2 gah ring bal pơn jat tai pơgồp bal niam, kờñ bal mờ gơ̆p, sùm cribơyai, tă pơgồp jơnau đơs bal mờ gơ̆p tàm ală dơ̆ cribơyai uă lơgar, tàm tiah do mờ tàm dunia, ngan là Asean, Liên hợp quôk mờ ală broă lơh lơh broă bal tiah dềt, pơgồp bơnah lơh niam sùm bơta tam klăc bal, dùl nùs bal mờ gơnoar broă tờm bơh Asean dê tềng đap ală bơta lòng tàm bơta pa.