Tàm dơ̆ cribơyai, bàr nă Thủ tướng chờ hờp sền gŏ bơta pin dờn mờ gơn kơnờm tàm broă lơh broă bal bơcri priă, kă bro. Tus tŭ do, priă bơcri cih mat tàm sră nggal dan bơcri tus lơgar Campuchia lơh geh rlau 2 tơmàn 930 tơlak dolar Mỹ. Campuchia sùm gàr lơgar ơm dơ̆ 2 tàm 78 dà lơgar mờ kơnhoàl ù tiah geh bơcri priă bơh mpồl lơh sa kă bro lơgar Việt Nam dê. Việt Nam kung pơn jăt tai gàr kơ̆ lơgar ơm dơ̆ dùl Asean mờ tàm mpồl 5 lơgar bơcri priă tơn uă ngan rlau jơh tàm lơgar Campuchia. Đơs tàm cribơyai, Thủ tướng Cíñ phủ ồng Phạm Minh Chính jờng rơ ngan tiah bơcri priă kă bro bơh lơgar Campuchia dê gam geh lơh niam wơl uă ngan bơh broă ai lơh jăt Adat Bơcri priă pa mờ Adat Tiah lơh sa krơi is.

Thủ tướng kung jờng rơ sồr ală cau bơcri priă, ală mpồl lơh sa kă bro lơgar Việt Nam mờ Campuchia dê tơrgùm bơta pràn, lơh mhar broă lơh ală rơndăp broă lơh bơcri priă, pal lơh jăt di tơngai, mờ lơh niam; lơh jăt niam adat boh lam bàr lơgar dê; mơkung tơnguh uă nùs nhơm geh kơnòl mpồl bơtiàn gơwèt mờ mpồl bơtiàn, ai geh broă lơh mờ priă lơh geh sùm, sền gàr tiah ơm kis mờ lơh jăt broă lơh sền gàr lơngăp lơngai rài kis mpồl bơtiàn, pơgồp bơnah tàm bơta bơtàu tơnguh, pas sơm bơh bàr lơgar dê.