Mang ngai 02/11, tàm Anih tờm pơrjum dà lơgar, Thủ tướng Cíñ phủ ồng Phạm Minh Chính tus bal mờ đơs tàm Dơ̆ yal phan bơna lơh geh Mat kă bro dà lơgar Việt Nam dơ̆ 8, nam 2022. Do là dùl broă lơh kwơ màng, bềng bơta kwơ nàng kờñ jờng rơ ală măt kă bro phan bơna kă bro, drơng broă niam, geh bơngă pin dờn, tơngŏ bơta bơtàu tơnguh pràn kơl dang bơh ală mpồl lơh sa kă bro Việt Nam dê mờ rài lơh sa, pơgồp bơnah ai mat phan kă bro Việt Nam ngai sơlơ gơ gơs rềp mềl, pin dờn mờ gơ kờñ rlau tai tàm drà kă bro tàm lơgar mờ tàm dunia. Tơnơ̆ mờr 20 nam lam lơh jat, khà mpồl lơh sa kă bro geh phan bơna lơh geh Mat kă bro dà lơgar sùm gơguh bơh ală nam, bơh 30 mpồl lơh sa kă bro nam 2008 geh tus 172 mpồl lơh sa kă bro nam 2022. 172 mpồl lơh sa kă bro geh mả kă bro dà lơgar nam 2022 geh cồng nha lơh sa kă bro niam mờ kờp jơh priă lơh geh nam 2021 pơgap 1 rơbô 570 tơmàn đong, tong tàm kes priă dà lơgar mờr 129 rơbô tơmàn đong, lơh geh broă lơh, priă lơh geh ai mờr 600 rơbô nă cau lơh broă in, lơh jat niam ală broă lơh sền gàr lơngap lơngai rài kis mpồl bơtiàn in mờ geh kơnòl mpồl bơtiàn bơh mpồl lơh sa kă bro dê.

Thủ tướng Cíñ phủ ồng Phạm Minh Chính tus bal dơ̆ Yal bơr phan bơna lơh geh Mat kă bro dà lơgar Việt Nam dơ̆ 8 nam 2022 (Rùp: TTXVN dê)

Ala mat kwang đơng lam bồ Đảng, Dà lơgar, Thủ tướng Cíñ phủ ồng Phạm Minh Chính jơh nùs ngan gờm chờ 172 mpồl lơh sa kă bro geh phan bơna lơh geh Mat kă bro Dà lơgar nam 2022; mơkung đơs sùm, kơnòl broă bơt bơtàu mờ sơlơ tơnguh Mat kă bro Dà lơgar geh kwơ ngan tàm broă lơh jŏ jòng mờ do kung là kơnòl broă kơn jơ̆ ngan mơya dờng màng ngan bơh mpồl lơh sa kă bro, cau lơh sa kă bro Việt Nam dê.