Lơh geh ală bơta gơn kơnờm gơguh tai pa nàng bơceh lơh rài tơnơ̆ do dà lơgar in.

Do là broă lơh lơh broă mờ lơgar ndai dà lơgar mìng dùl dơ̆ lơm geh WEF bơyai lơh tàm dơ̆ Pơrjum, nàng kờñ tàm yal tơngĭt bal bơta mờng chài bơh lơgar Việt Nam dê bè dùl krơh lam lài bè bơtàu tơnguh wơl lơh sa mờ gam lơh pràn tam gơl broă lơh gơguh tai, lơh geh tŭ niam nàng cribơyai bè ală bơto pơlam, gùng dà broă lơh mờ tiah bơcri priă- lơh sa kă bro tàm lơgar Việt Nam. Đơs tờm tàm Pơrjum, Thủ tướng Cíñ phủ ồng Phạm Minh Chính yal tơngĭt jơnau bè broă bơtàu tơnguh lơh sa- mpồl bơtiàn lơgar Việt Nam dê, mờ đơs sùm là rài lơh sa geh bơta rề ơnàng uă, bulah tàm tŭ tơngai kal ke ngan gĭt lơh, lơgar Việt Nam neh bơsong mờ sơrlèt gan geh cồng nha mờ ală jơnau rềs àr gơ aniai, bơta lòng bơh đah bơdìh, gàr kơ̆ kơnhăp lơh sa dờng, gròi sền roh giă priă mờ gàr niam ală jơnau tàm pơnring dờng, dong kờl gơguh tai, bơ̆t bơtàu pràn kơldang kơ̆ kơl jăp sền gàr dà lơgar lơngăp lơngai, tiah ơm kis ring lơngai, kơ̆ kơl jăp ai bơtàu tơnguh in. Lơgar Việt Nam gam pơn jăt tai tam gơl pa pràn kơldang broă lơh gơguh tai, rơndăp tăp sèng wơl rài lơh sa, lơh tam gơl pa bơceh lơh mờ tam gơl sồ, lơh pràn tam gơl năng lượng, bơtàu tơnguh rài lơh sa tơlir, lơh sa gơlòt pơdar. Thủ tướng Cíñ phủ ồng Phạm Minh Chính sồr WEF mờ ală lơgar tàm mpồl pơn jăt tai lơh broă bal, dong kờl Việt Nam bè măy mok, priă jền, bơto cau lơh broă jak, ătbồ pa jak chài.

 Mho dùl ngai bal, Thủ tướng Cíñ phủ ồng Phạm Minh Chính neh wă ồng Robert H.McCooey, Jr., Phó Củ tịc Tập đoàn Nasdaq, lơgar Mỹ. Thủ tướng ưn ngài bơta sền gròi, dong kờl bơh Nasdaq dê gơ wèt mờ mpồl lơh sa kă bro Việt Nam, kơp kờñ Nasdaq cribơyai, tam pà mờ Việt Nam bè broă lơh priă jền ală lơgar dờng, gùng dà drà priă jền gùt plai ù, yal tơnggit jơnau mờ tam pà mờng chài dong bơtàu tơnguh drà bơcri priă tàm lơgar, pơn jat tai lòt bal mờ bơta bơtàu tơnguh bơh ală mpồl lơh sa kă bro lơgar Việt Nam dê. Phó Củ tịc Tập đoàn Nasdaq đơs niam  cồng nha bơtàu tơnguh wơl mờ bơta gơguh lơh sa bơh lơgar Việt Nam dê, đơs niam broă lơh đơng lam priă jền bơh Cíñ phủ dê; pin dờn tàm bơta bơtàu tơnguh ngac ngar bơh mpồl lơh sa kă bro Việt Nam dê; hơ pơrgon dong kờl ală mpồl lơh sa kă bro Việt Nam brồ guh tus gùt plai ù. Phó Củ tịc Tập đoàn Nasdaq kơp kờñ geh wă Thủ tướng Cíñ phủ còp anih lơh broă cứng khoán Nasdaq tàm tơngai gờñ ngan rlau jơh.

Kung tàm dơ̆ Pơrjum WEF Thiên Tân sơl, mho ngai 26/06, Thủ tướng Cíñ phủ ồng Phạm Minh Chính neh wă Cau gơnoar bơto ồng Klaus Schwab, Cau crơng gơs mơkung là Kwang ătbồ đơng pơlam WEF mờ sền gŏ dơ̆ bơyai lơh kĭ hơ Sră nggal cih kah lơh broă bal (MOU) đah lơgar Việt Nam mờ WEF tơngai bơh nam 2023- 2026. Thủ tướng đơs sùm, Việt Nam rơ̆p pơn jăt tai kơ̆ dơn jơnau kờñ kơnhăp lơh sa dờng mờ chồl tơnguh gơguh tai. Thủ tướng sồr WEF pơn jăt tai lòt bal mờ lơgar Việt Nam, pơn jăt tai dong kờl tàm tơrbŏ bal mờ ală mpồl lơh sa kă bro gơwèt WEF, dong lơgar Việt Nam gơhòi gơ jà bơcri priă cồng nha uă, ngan là tàm ală gah broă lơh măy mok pa, tam gơl năng lượng, tam gơl sồ, phan bơna kwơmàng mờ sơlơ tàm lùp. Thủ tướng kung sồr WEF yal bè ală gùng dà bơtàu tơnguh bơh dunia dê, bơto pơlam gùng dà broă lơh dong Việt Nam tơnguh uă bơta tơl pràn tàm pơrlòng, lơh niam wơl tiah bơcri priă mờ lơh sa kă bro, gơdờp mờ ală jơnau sồr, gùng dà pa.